नेपालमा छायांकन गरिएको बलिउड फिल्म ‘उचाई’ को ट्रेलर सार्वजनिक भएको छ।

सार्वजनिक ट्रेलरमा बुढेसकालमा हिमाल चढ्न चाहने अमिताभ बच्चन, बोमन इरानी र अनुपम खेरको कथा देखाइएको छ। जसमा उनीहरूलाई सगरमाथासम्म पुर्‍याउने जिम्मा परिणिती चोपडाले पाएकी छन्।
यो फिल्मको ६० प्रतिशत छायांकन नेपालमा गरिएको हो। हिमाली भेगमा छायांकन भएको हुँदा अमिताभ बच्चन उपस्थित थिएनन्। नेपालमा भएको छायांकनमा उनको डमी कलाकार प्रयोग गरिएको थियो। मुम्बइमा भएको छायांकनमा अमिताभले नै अभिनय गरेका छन्।

राजश्री प्रोडक्सनले निर्माण गरेको फिल्मलाई सुरज वर्जत्यले निर्देशन गरेका हुन्।
मित्रताको कथामा बनेको फिल्ममा अभिताभ, बोमन र अनुपम, परिणितीसँगै डेनी डेन्जोङ्पा, नीना गुप्ता र सारिका हसनको मुख्य भूमिका छ। फिल्ममा नेपाली कलाकारले पनि अभिनय गरेका छन्।

मनोजकुमार खतोइले छायांकन गरेको फिल्मलाई श्वेता वेंकट म्याथ्यूले सम्पादन गरेका हुन्।

यो फिल्म आगामी कात्तिक २५ गतेदेखि प्रदर्शन हुँदैछ।