चितवन, कात्तिक २४: प्रतिनिधि सभा र प्रदेश सभा निर्वाचन हुन अब १० दिन मात्र बाँकी छ । निर्वाचन नजिकिँदै गर्दा दलहरुले प्रचारप्रसारलाई तीव्रता दिएका छन् । शिर्ष नेताहरु देश दौडामा छन् । देश दौडाहाका क्रममा नेकपा एमाले र सत्ता गठबन्धनका शिर्ष नेताहरु चितवन आउँदै छन् ।

एमाले र गठबन्धनले चितवनमा आयोजना गर्न लागेको चुनावी सभालाई सम्बोधन गर्न शिर्ष नेता यहाँ आउने भएका हुन् । गठबन्धनले कात्तिक २६ गते चुनावी सभा गर्न लागेको नेपाली कांग्रेस चितवनका सभापति राजेश्वर खनालले जानकारी दिए ।

गठबन्धनको चुनावी सभालाई सम्बोधन गर्न प्रधानमन्त्री एवम् नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा (एकिकृत समाजवादी)का अध्यक्ष माधव नेपाललगायतका नेता चितवन आउने भएका छन् ।

एमालेले कात्तिक २८ गते चुनावी सभाको आयोजना गर्दै छ । चुनावी सभालाई सम्बोधन गर्न एमाले अध्यक्ष केपी शर्मा ओलीलगायत पार्टीका शिर्ष नेता आउने एमाले चितवनले जानकारी दिएको छ । हरेक निर्वाचनमा जस्तै यस पटक पनि चितवन राष्ट्रिय चर्चामा देखिन्छ ।