माडी, २४ कार्तिक : प्रतिनिधिसभा चितवन क्षेत्र नम्बर ३ का उम्मेदवार डा. भाेजराज अधिकारीले यहाँका थारू समुदायमा देखिएकाे सिकलसेल एनिमिया राेगकाे अनुसन्धान गर्ने बताएका छन् । थारू समुदायमा मात्रै याे राेग देखिन्छ । यसअघि केन्द्रीय स्वास्थ अनुसन्धान परिषदमा रहदाँ बाँके बर्दियामा आफुले साे राेगकाे अध्ययन गरेको उल्लेख गर्दै उनलेे चितवनमा समेत अनुसन्धान गर्ने बताएका हुन् ।

“म राष्ट्रिय स्वास्थ अनुसन्धान परिषद्को उपाध्यक्ष भएको समयमा बाँके, बर्दियाका थारू समुदायमा मात्रै सिकलसेल एनिमिया भन्ने राेग देखियो,” चुनावी सभालाई सम्बाेधन गर्दै डा. भाेजराजले भने,” त्यहीँ समयमा चितवनका थारू समुदायमा समेत याे आवश्यक देखेर अनुसन्धान गर्ने निर्णय गरेका छाैें, अब अनुसन्धान सुरु हुन्छ ।” यसको नियन्त्रणका उपाय अघि बढाउने उनको प्रतिबद्धता छ । स्वास्थ क्षेत्र स्वभाविक रूपले नै प्राथमिकतामा परेको उनलेे बताए । माडीका स्वास्थ्य र शैक्षिक संस्था सुधार गर्न पहल गर्ने डा. भाेजराजकाे जाेड छ । बगाैडा अस्पताललाई विशिष्टिकृत अस्पतालका रूपमा अघि बढाईने उनलेे बताए । थारू समुदायको सम्मान हुने गरि याेजना बनाउने उनलेे बताए ।

यस्तै लाेकतान्त्रिक-बाम गठबन्धन अन्तर्गत प्रदेशसभाका उम्मेदवार ठाकुर ढकालले रेवा खाेला तटबन्ध गर्न पहल गर्ने बताएका छन् । शिवद्वारबाट साैराहा पर्यटन मार्ग बनाउन याेजना अघि बढेको ढकालले बताए । नागरिकता विहिन समुदायसँगकाे भेटघाटमा गठबन्धनका उम्मेदवार डा. भाेजराज र ठाकुरले जन्मका आधारमा नागरिकता दिने विषय चाडैं समाधान हुने प्रतिबद्धता व्यक्त गरेका छन् ।