चनौली । भरतपुर–१८ स्थित गुञ्जनगर खानेपानी तथा सरसफाइ उपभोक्ता संस्थाको छैठाँै साधारण सभा शनिबार चनौलीमा सम्पन्न भएको छ ।
बागमती प्रदेशसभा सदस्य माया श्रेष्ठको प्रमुख आतिथ्यतामा सम्पन्न सभामा सांसद् श्रेष्ठले खानेपानीको क्षेत्रमा यस संस्थाले उल्लेखनीय काम गरेको भन्दै काम गर्नका लागि एकरुपता आवश्यक भएको बताइन् ।
उनले थप योजनाहरु अघि बढाउन प्रदेश सरकारको सहयोग रहने बताउँदै विपन्न वर्गलाई धारा जडान र मासिक शुल्कमा गर्न सक्ने छूट दिन आग्रह गरिन् ।
वार्षिक प्रगति प्रतिवेदन प्रस्तुत गर्दै संस्थाका अध्यक्ष महेन्द्र गुरूङले करिब २२ सय घरधुरीलाई सुरक्षित पिउने पानी वितरण गर्दै आएको यो संस्थाको भरतपुर–१८ मा पाँच कट्ठामा साढे चार लाख लिटर क्षमताको ब्लक ‘ए’ ओभरहेड ट्याङ्की रहेको र भरतपुर–२० मा पाँच कट्ठामा ब्लक ‘बी’ दुई ओभरहेड ट्याङ्की बन्ने क्रममा रहेको उनले बताए ।
भरतपुर–१७, १८, १९, २०, २५ र २६ मा सेवा विस्तार गरिरहेको संस्थाले १२० किमी पाइपलाइन विस्तारको अनुमानित सर्वेक्षण भएको अध्यक्ष गुरूङले बताए । खाने पानीको माग बढ्दै गएकोले खानेपानीमा उपभोक्ताको पहुँच बढाउन भरतपुर–१७ मा रहेको भुवनबस्ती तथा गाजीपुर क्षेत्रमा प्राविधिक सम्भाव्यता अध्ययनसमेत भएको बताए ।
सो संस्थाले उपभोक्ताबाट न्यूनतम १२ हजार लिटरसम्मको एक सय रूपैयाँ मासिक शुल्क लिँदै आएको छ ।
संस्थाका कोषाध्यक्ष छविलाल ढकालले आयव्यय प्रतिवेदन प्रस्तुत संस्थाको चालू वर्षको कुल अम्दानी ८६ लाख ०६ हजार दुई सय २७ र सस्थाको चालू वर्षको कुल खर्च ४३ लाख पाँच हजार १३५ साथै संस्थाको कुल सम्पत्ति एक करोड ०३ लाख १८ हजार ९१६ रूपैयाँ रहेको बताए ।
सो अवसरमा बोल्दै प्रमुखअतिथि भरतपुर–१८ का वडाध्यक्ष बाबुराम राना मगरले खानेपानी योजनालाई थप व्यवस्थापन गरेर गुणस्तरीय सेवाप्रवाह गर्न सक्ने भन्दै उनले सबै वडाभित्रका उपभोक्ताले शुद्ध र स्वच्छ खानेपानीको उपभोग गर्न पाउने बताए ।
कार्यक्रममा जिल्ला समन्वय समिति चितवनका सदस्य कृष्णभक्त भट्टराई, संस्थाका पूर्वअध्यक्ष एकनारायण पौडेल, पूर्वउपाध्यक्ष हरिप्रसाद ढकाल, वडा सदस्य दिलु गजमेर, अम्बरबहादुर तामाङ, होमनाथ ढकाल, अनिता थापा, देवीदत्त दवाडी, कमलनाथ पौडेललगायतले मन्तव्य राखेका थिए । संस्थाका सचिव सुरेशचन्द्र ढकालले कार्यक्रमको सहजीकरण गरेका थिए ।
२०५९ सालमा संस्था स्थापना भएको र नेपाल सरकार खानेपानी तथा सरसफाइ डिभिजनको योजनाअन्तर्गत २०६३ असारबाट निर्माण सुरू गरिएको आयोजना चार करोड २६ लाखको लागतमा सम्पन्न भई २०७१ जेठ २१ गतेबाट पानी वितरण सुरू गरिएको हो ।
