मार्सल ल लगाउने राष्ट्रपति युन सुक योलको निर्णयसँगै राजनीतिक अस्थिरता खेपिरहेको दक्षिण कोरियाका रक्षामन्त्रीले पदबाट राजीनमा दिएका छन् । प्रधानमन्त्री र क्याबिनेट सदस्यलाई समेत जानकारी नदिई मार्सल ल लगाउने योजनाका उनी मास्टरमाइन्ड भएको बताइएको छ ।
दक्षिण कोरियाली राष्ट्रपति युनले मंगलबारराति ११ बजे देशका नाममा सम्बोधन गर्दै अचानक मार्सल ल लगाउने घोषणा गरेका थिए । तर, सैनिक र प्रहरीले कब्जा गर्नुअघि नै विपक्षीले संसदबाट बहुमतले राष्ट्रपतिको कदम अस्वीकार गर्नुका साथै हजारौँ जनताले सडकबाट प्रतिरोध गरेपछि राष्ट्रपति आफ्नो निर्णय फिर्ता लिन बाध्य भएका थिए ।
जुन घटनाको जिम्मेवारी लिँदै रक्षामन्त्री किम योङ ह्युनले राजीनामा दिएका हुन् । उनी दक्षिण कोरियाली सेनाका रिटायर्ड जनरल पनि हुन् । उनको स्थानमा साउदी अरबका लागि राजदूत रहेका चोई ब्युङ–ह्युकलाई नयाँ रक्षामन्त्री बनाइएको छ ।
दक्षिण कोरियाको संसदमा राष्ट्रपति युनको पिपुल्स पावर पार्टी अल्पमतमा छ भने विपक्षी डेमोक्र्याटिक पार्टी बहुमतमा छ । त्यसैले राष्ट्रपतिका निर्णयलाई संसदले उल्ट्याउँदै आएको छ । सोही कारण रक्षामन्त्री किम योङले राष्ट्रपतिलाई देशमा मार्सल ल लगाउन सुझाव दिएका थिए ।
द कोरियन टाइम्सको रिपोर्टअनुसार राष्ट्रपतिले देशमा मार्सल ल लगाउने घोषणा गर्न लागेको विषयमा प्रधानमन्त्री हान डक सुलाई पनि जानकारी थिएन । राष्ट्रपति युनका विश्वासपात्र रक्षामन्त्री किमले प्रधानमन्त्रीलाई समेत बाइपास गरेर सिधा राष्ट्रपतिसँग सम्पर्क गरी मार्सल ल लगाउने सुझाव दिएका थिए । उनको सुझावलाई लिएर क्याबिनेटमा छलफलसमेत भएन ।
दक्षिण कोरियाका राजनीतिमा राजधानी सोलस्थित चङ्गम हाइस्कुलबाट उदाएका नेताहरूको चङ्गम गुटको निकै महत्त्व छ । रक्षामन्त्री किम र राष्ट्रपति युन यही गुटका सदस्य हुन् । मार्सल ल लगाउने राष्ट्रपतिको घोषणापछि दक्षिण कोरिया आन्तरिक राजनीतिक अस्थिरताको भूमरीमा परेको छ । राष्ट्रपति युनका चिफ अफ स्टाफसहित एक दर्जनभन्दा बढी मन्त्रीले राजीनामा दिएका छन् ।
मार्सल ल लगाउने निर्णयको विपक्षीसँगै उनकै पिपुल्स पावर पार्टी नै विरोधमा छ । पार्टी नेता हान डोङ ह्युनले यसको विरोध गर्दै विपक्षी नेता ली जे म्युङसँग हात मिलाएका छन् । राष्ट्रपतिविरुद्ध सत्ताको दुरुपयोग र भ्रष्टाचारको आरोपमा महाअभियोग लगाउन माग गरिरहेका छन् । त्यसैले मार्सल ल लगाउने र युटर्न भएर फिर्ता लिने कदम युनका लागि भारी हुने देखिएको छ ।
यद्यपि उनको पिपुल्स पावर पार्टीले भने संसदमा महाअभियोग रोक्न आफ्ना सहयोगीलाई एकजुट बनाउने बताएको छ । नेता हान डोङ–ह्युनले पार्टी नेताका रूपमा महाअभियोग पारित हुन नदिन काम गर्ने बताएका छन् । महाअभियोगले अप्रत्याशित अराजकता पैदा हुन सक्ने तथा जनता र समर्थकमाथि नोक्सानी पुग्न सक्ने दाबी गरेका छन् । तर, राष्ट्रपतिले लगाएको मार्सल लको समर्थन नभएको उनको भनाइ छ ।
उनले असंवैधानिक मार्सल लबाट जनतालाई तर्साउले राष्ट्रपतिदेखि सबैलाई जवाफदेही बनाउनुपर्ने बताएका छन् । राष्ट्रपतिलाई सत्ताबाट हटाउनका लागि विपक्षीलाई राष्ट्रपति युन सुक–योलको पार्टीका ८ सांसदको समर्थन आवश्यक छ ।
