काठमाडौं,मंसिर २३-
सत्ता समीकरण कस्तो हुने भन्ने तीव्र बहस भइहेका बेला नेकपा माओवादी केन्द्रका अध्यक्ष पुष्पकमल दाहाल प्रचण्ड नेपाल समाजवादी पार्टीका अध्यक्ष डा.बाबुराम भट्टराई र नेपाली कांग्रेसका बरिष्ठ नेता रामचन्द्र पौडेलबीच वार्ता भएको छ । शुक्रबार नेकपा माओवादी केन्द्रको संसदीय दलको कार्यालय सिंहदरबारमा भएको भेटवार्तामा नयाँ सत्ता समीकरणका विषयमा छलफल भएको छ। वर्तमान सत्ता गठबन्धनकै दलका नेताबीच अबको सरकार कस्तो बनाउने भन्ने विषयमा छलफल केन्द्रित भएको थियो।
भेटमा क्रममा कांग्रेस नेता पौडेलले आफूलाई प्रधानमन्त्री बनाउने भूमिका खेल्न प्रचण्ड र भट्टराईसँग सहयोग मागेका छन्। उनले छलफलका क्रममा अब कांग्रेसको संसदीय दलको नेतामा आफू पनि लड्ने बताएको प्रचण्ड निकट स्रोतले जनाएको छ।
अहिले नेपाली कांग्रेसभित्र अबको प्रधानमन्त्री को बन्ने भन्ने आन्तरिक बहस छ। पार्टी सभापति शेरबहादुर देउवा आफैँ प्रधानमन्त्रीका दावेदार हुन् ।
