बैंकहरू एक-आपसमा मर्जरमा जान थालेपछि कर्मचारी घटाउने तयारीमा छन् । यसका लागि बैंकहरूले आकर्षक प्याकेजहरू घोषणा गरेका छन् ।
हालै मात्र मर्जरका लागि अन्तिम सम्झौता गरेको ग्लोबल आईएमई बैंक र बैंक अफ काठमाण्डू (बीओके) ले कर्मचारी कटाैतीका लागि प्याकेज ल्याएका छन् । ग्लोबल आईएमईले तेस्रोपटक भोलेन्टियरी रिटायर्डमेन्ट सर्भिस (भीआरएस) सुविधा ल्याएको छ । यसअघि बैंकले दोस्रोपटक भीआरएसमार्फत कर्मचारी व्यवस्थापन गरेको थियो ।
ग्लोबलले न्यूनतम १० देखि बढीमा २५ महिनाको तलब सुविधा दिने गरी स्किम सार्वजनिक गरेको छ । विगतमा ग्लोबलले ल्याएको भीआरएस स्किमअन्तर्गत न्यूनतम १२ देखि १६ महिनाको तलब सुविधा दिइएको थियो । लामो समय काम गरेका कर्मचारीको हकमा यो सुविधा ल्याउनु उपयुक्त हुने देखिन्छ ।
उक्त भीआरएस असिस्टेन्ट म्यानेजरदेखि व्यवस्थाकीय जिम्मेवारीमा बसेकाहरूसम्मले लिन सक्छन् । उक्त सुविधाका लागि ग्लोबल आईएमईमा ५ वर्ष सेवा अवधि पूरा गरेको हुनुपर्ने छ ।
त्यसैगरी, आकर्षक प्याकेजअन्तर्गत कर्मचारी सुविधाअन्तर्गत लिएको होम लोन र अटो लोनका लागि पनि विशेष प्याकेज ल्याइएको छ । त्यसका साथै करको दायित्व पनि बैंक आफैँले व्यहोर्ने भएको छ । पाँच वर्ष सेवा गरेका असिस्टेन्ट म्यानेजर र वरिष्ठ व्यस्थापकलाई १० महिनाको तलब सुविधा दिने स्किम छ ।
२० वर्षदेखि माथि काम गरेका सिनियर म्यानेजर र त्यसमाथिका लागि २४ महिनाको र असिस्टेन्ट म्यानेजर र म्यानेजरलाई २५ महिनाको तलब सुविधा दिने भीआरएस ल्याइएकाे हो ।
१५ देखि २० वर्ष बैंकमा काम गरेका सिनियर म्यानेजर र त्यसमाथिका लागि २२ महिनाको र असिस्टेन्ट म्यानेजर र म्यानेजरलाई २३ महिनाकको सुविधा दिने भएको हो ।
ग्लोबलमा ५ देखि १० वर्ष सेवा गरेका सिनियर म्यानेजरसहितलाई १५ महिनाको तलब सुविधा, असिस्टेन्ट म्यानेजर र म्यानेजरलाई १६ महिनाको, १० देखि १५ वर्ष बैंकमा काम गरेका सिनियर म्यानेजर र त्यस माथिकालाई २० महिनाको तलब सुविधा दिने भएको हो ।
यसैगरी, असिस्टेन्ट म्यानेजर र म्यानेजरलाई २१ महिनाको सुविधा दिने भएको छ ।
