भरतपुर, १५ असोज
चाडबाडलाई लक्षित गरी नारायणगढमा सहुलियत पसल सञ्चालनमा आएको छ । साल्ट ट्रेडिङ कर्पोरेशन लिमिटेड नारायणगढले आज(विहिबार) देखि सहुलियत पसल सञ्चालनमा ल्याएको हो । पसल हरेक दिन विहान १० बजेदेखि दिउसो २ बजेसम्म खुल्नेछ ।

कार्यालय प्रमुख  वुद्धि विनोद दाहालले सुपथ मूल्यको पसल मंसीर ६ गतेसम्म सञ्चालन हुने बताउनुभयो । पसलमा आउने उपभोक्तालाई स्वास्थ्य सुरक्षाका मापदण्ड अपनाउँदै सामाजिक र भौतिक दुरी कायम गर्दै सामान खरिद गर्न अनुरोध गरिएको बताउनुभयो । विक्रि कक्षमा उपभोक्ताको भीड हुन नदिन भैतिक दुरी कायम हुने गरी उभिने ठाउँहरु निर्धारण गरिएको छ । सामान खरिद गर्न आउँदा मास्क अनिवार्य लगाउनुपर्ने बताउनुभयो । नजिकै हात धुने र सेनिटाइजर लगाउने व्यवस्था समेत मिलाइएको छ । उपभोक्ताले चिनी र नुन बढीमा ४ केजीमात्रै खरिद गर्न पाउनेछन् । तेल, गेडागुडी, दाल, चामल लगायतका अन्य खाद्यान्न आवश्यकताअनुसार गरिद गर्न पाउने बताउनुभयो । साल्ट ट्रेडिङले प्रतिकेजी चिनीको ७० रुपैयाँ र नुन १८ रुपैयाँमा बिक्रि गरेको छ । बजारमूल्य हेर्दा चिनी १० रुपैयाँ र नुन २ रुपैयाँ कम देखिन्छ । “बजारमा कृत्रिम अभाव नहोस्, मूल्य वृद्धि नहोस् भनेर सुपथ पसल सञ्चालनमा आएको हो”, उहाँले भन्नुभयो, “यहाँको मूल्यले बजारमा मूल्य वृद्धि हुनबाट रोक्ने अपेक्षा गरेका छौँ ।”

यसपाली दुई थरिका इन्डेक्स चुल्हो पनि बिक्रिमा राखिएको छ । ३ हजार ५ सय रुपैयाँ र २ हजार ६ सय ५० रुपैयाँ मूल्य तोकिएको छ । यसपाली घुम्ती पसल सञ्चालन नहुने भएका छन् । कोभिड–१९ को प्रभावले गर्दा गाउँका बजारमा पुगेर विगतमा चलाइए जस्तै घुम्ती पसल नचल्ने भएका हुन् । गत वर्ष साल्ट ट्रेडिङले चिनी ७२ रुपैयाँ र नुन १८ रुपैयाँमा बिक्रि गरेको थियो । गत वर्षको सहुलियत दरको पसलबाट चिनी ८९ हजार २ सय २४ केजी, नुन ४५ हजार ७ सय ४३ केजी,  अन्य सामान (चामल, दाल, तेल, गेडागुडी, चियापत्ति, मसला) २८ लाख १७ हजार १ सय ४३ रुपैयाँ बराबरको बिक्रि भएको थियो । गत वर्ष चाडबाडमा मात्रै १ करोड ६४ हजार ६ सय ५५ रुपैयाँ बराबरका खाद्यान्न बिक्रि भएको थियो ।