चितवन भरतपुर स्थित एक बालिका शनिबार साँझ तिर बलात्कृत भएकी छन् । भरतपुर महानगरपालिका–५ स्थित माछापुच्छ्रे चोक नजिकै घरमै रहेकी बालिकालाई भरतपुरमा बस्दै आइरहेका अन्दाजी ३८ वर्षका दीपक राईले बलात्कार गरेका थिए ।
उनलाई प्रहरीले आज (आइतबार) विहान पक्राउ गरि सकेको छ । बलात्कारको आरोपमा ती पुरुषलाई पक्राउ गरिएको जिल्ला प्रहरी कार्यालय चितवनका प्रवक्ता प्रहरी नायव उपरीक्षक सूर्यबहादुर थापाले जानकारी दिए । ‘पक्राउ गरेर अनुसन्धान गरिरहेका छौँ, बालिकाको मेडिकल रिपोर्ट आएपछि अनुसन्धानले थप गति लिन्छ’–प्रवक्ता थापाले भने । उनले बालिकाको स्वास्थ्य परीक्षण भइरहेको जानकारी दिए ।
घरमा बालिकाकी १० वर्षीय दाजु र आमा बसोबास गर्दै आइरहेका थिए । शनिबार साँझ आमा माइत गएको बेलामा घरमा पुगेका राइले बालकलाई बिस्कुट किन्न पठाएर बालिकालाई बलात्कार गरेको उनको आफन्तले बताएका छन् । उनका आफन्तले भने–‘राई अन्य बेला पनि घरमा गइरहँदो रहेछ, शनिबार घरमा कोही नभएको बेला बलात्कार गरेछ ।’ बालिकाले विहानैदेखि बान्ता गरेपछि आफन्तले घटना बारे थाहा पाएका थिए ।
बालिकाका आफन्तका अनुसार प्रारम्भिक स्वास्थ्य परीक्षण गर्दा बालिकाको पाठेघरमा रगत जमेको देखिएको छ।
स्रोत : नारायणी अनलाइन
