नेपाल विद्युत् प्राधिकरणका कार्यकारी निर्देशक हितेन्द्र देव शाक्यले आफूलाई सरकारले जहाँसुकै पठाए पनि जान तयार रहेको बताएका छन्।
बुधबार प्राधिकरणमा पत्रकारहरूसँग कुरा गर्दै कार्यकारी निर्देशक शाक्यले आफूलाई सरकारले अरू जिम्मेवारी दिन सकिन्छ कि भन्ने सन्दर्भमा सोधेको जानकारी दिँदै उनले आफ्नो आवश्यकता महसुस गरेर सरकारले जहाँ पठाए पनि जाने बताएका हुन्।
आफू इन्जिनियरिङ क्षेत्रको मान्छे भएकाले सम्बन्धित क्षेत्रसँग जोडिएका जुनसुकै ठाउँमा पनि जाने बताए।
‘मलाइ अब अरू कुनै जिम्मेवारीहरू दिन सकिन्छ कि भनेर सोध्नुभएको हो। मैलेचाहिँ मेरो आवश्यकता महसुस गरेर सरकारले जहाँसुकै पठाए पनि म तयार छु भन्या छु। म जागिर खाएको सुरुको दिनदेखि इन्जिनियरिङमा स्वावलम्बी, इन्जिनियरिङमा आफूमै भर पर्ने, विदेशी परामर्शदातामा भर नपर्ने भनेर पहिलो दिनदेखि नै विदेशी टेक्निसियनमा भर नपर्ने भनेर लागिरहेको हो। टेक्निकल मेरो फिल्ड हो। प्लानिङ पनि गर्छु। धेरै वटा प्लानिङ गरेको छु। आफ्नो क्षेत्रसँग जोडिएको जुनसुकै क्षेत्रमा पठाए पनि काम गर्छु।’
कार्यकारी निर्देशक शाक्यले आफ्नो कार्यकाल अवधिभर कोरोना संक्रमणका कारण लकडाउन भएको भए पनि विद्युतमा कुनै समस्या नहुने गरी काम गरेको दाबी गरे।
अघिल्लोभन्दा यस वर्ष कम नै विद्युत् आपूर्ति रोकिएको उनको भनाइ थियो। अस्पतालहरूलाई विद्युत नजाने गरी बन्दोबस्त मिलाएको तथा गइहाले पनि तुरुन्तै सञ्चालनमा ल्याएको उनले स्पष्ट पारे।
यसबीचमा ढल्केबर ४०० केभी सबस्टेसनलाई नेपाल भारत ४०० केभीमा सञ्चालनमा ल्याएको, खिम्ति ढल्केबर २२० केभी सञ्चालन गरेको, अपर तामाकोशीको काम बढाएको, थप १३ वटा जिल्लालाई पूर्ण विद्युतीकरण गराएको तथा कर्णाली अञ्चलमा पहिलोपल्ट ७ ग्रिडको विद्युत पुर्याएको उनले बताए।
शाक्यले यो वर्ष १५ प्रतिशतले खपत बढेकाले चुहावट पनि बढेको बताए। घरघरमा पुगेर अनुगमन गर्न नसक्दा र हुकिङ तार हटाउन जान नसक्दा १ दशमलव ६ प्रतिशत चुहावट बढेको उनको दाबी छ।
आगामी दिन प्रसारण लाइन र वितरण लाइनमा जोड दिइने पनि उनले बताए।
हिजो (मंगलबार) प्रधानमन्त्री शेरबहादुर देउवाले पूर्व कार्यकारी प्रमुख कुलमान घिसिङलाई पुनः प्राधिकरणमा नियुक्त गर्न ऊर्जामन्त्री पम्फा भुसाललाई निर्देशन दिएका सञ्चारमाध्यममा खबर आएका थिए। तर यस विषयमा मन्त्री भुषालले आफूलाई प्रधानमन्त्री देउवाले कुनै पनि प्रकारको निर्देशन दिएकोबारे थाहा नभएको बताएकी थिइन्।
