छिमेकी मुलुक चीनले महाशक्ति राष्ट्र अमेरिकालाई पछि पार्दै विश्वकै धनी मुलुक बनेको छ । पछिल्लो २० वर्षमा चीनको सम्पत्ति तीव्र गतिले बढिरहेको छ तर, अमेरिकाको सम्पत्ति भने सोही गतिले बढेको देखिँदैन ।

कन्सल्टेन्सी फर्म म्याकिन्से एण्ड कम्पनीको पछिल्लो रिपोर्टअनुसार पछिल्लो दुई दशकमा विश्वभरको कुल सम्पत्ति तीन गुणाले वृद्धि भएको छ । विश्वको ६० प्रतिशत आय रहेका १० मुलुकको ब्यालेन्स सिटको जाँचपछि उक्त रिपोर्ट तयार पारिएको हो । २० वर्षको अवधिमा वृद्धि भएको विश्वको कुल सम्पत्तिमध्ये चीनले एक–तिहाई हिस्सा ओगटेको छ । अर्थात चीनको कुल सम्पत्तिमा १६ गुणा वृद्धि भएको छ ।

रिपोर्टअनुसार सन् दुई हजारमा विश्वको कुल सम्पत्ति करिब १५६ ट्रिलियन डलर थियो । तर, दुई हजार २० मा विश्वको कुल सम्पत्ति बढेर ५१४ ट्रिलियन डलर पुगेको छ । पछिल्लो २० वर्षमा चीनको तुलनामा अमेरिकाको सम्पत्तिमा कमी आएको छ ।

सम्पत्तिको मूल्यमा ज्यादा वृद्धि नहुँदा अमेरिकाले पहिलो स्थान गुमाएको र चीनले उछिनेर विश्वकै धनी मुलुक बनेको रिपोर्टमा उल्लेख छ । चीन र अमेरिका विश्वका सबैभन्दा ठूला अर्थतन्त्र भएका मुलुक हुन् ।

Image Source: The Japan Times