चितवन – यातायात व्यवस्था सेवा कार्यालय चितवनले सवारी चालक अनुमति पत्र (लाइसेन्स) नविकरणका लागि सफ्टवेर जडान गरेको छ । कार्यालयले लाइसेन्स नविकरण लागि इलोक्ट्रोनिक ड्राइभिङ लाइसेन्स रजिष्टेशन सिस्टम (ईडिएलआर) नामक सफ्टवेर जडान गरेको हो ।

यातायात विभागबाट आएको प्राविधिक टोलीले शनिबारबाट ईडिएलआर सफ्टवेर जडान सुरु गरेको थियो । आज बिहान जडान सम्पन्न भएको हो । सफ्टवेर जडान भएसँगै आज (आइतबार) बाट लाइसेन्स नविकरणको परीक्षण पनि सुरु भएको छ ।

आज आठ वटा लाइसेन्स नविकरण परीक्षण गरिएको कार्यालय प्रमुख बिनोद पौडेलले जानकारी दिए । परीक्षण गरिएको आठ वटै लाइसेन्सको नविकरण सफल भएको उनले बताए ।

अब सफ्टवेर दुई-तीन दिन बन्द गरिनेछ । उनका अनुसार ढिलोमा आउँदो आइतबारबाट सेवाग्राहीले नविकरण सेवा लिन सक्नेछन् । “आज बिहान सफ्टवेर जडान सम्पन्न भयो । आजै हामीले आठ वटा लाइसेन्सको परीक्षण नविकरण पनि गर्‍यौं, उनले भने, परीक्षण सफल भएको छ।”

अब आवश्यक थप पूर्वाधार व्यवस्थापन गरिने उनले बताए । सबै पूर्वाधार व्यवस्थापन गरेर आउँदो आइतबारबाट सेवा सुरु गरिने उनको भनाइ छ । “अब दुई-तीन दिन हामी आवश्यक पूर्वाधार व्यवस्थापन गर्छौं । ढिलोमा आइतबारबाट सेवा सुरु हुन्छ, उनले भने, आइतबार सोध्नै पर्दैन । नसोधी आउँदा पनि हुन्छ । सेवा पाईन्छ ।”

कार्यालयमा हुन सक्ने भिडभाडलाई मध्यनजर गर्दै अनलाइन टोकनको व्यवस्था गर्न लागिएको उनले बताए । सेवाग्राहीले अनलाइनबाट टोकन लिन सक्नेछन् । टोकनमा तोकिएको समयमा गएर लाइन नबसी सेवा लिन पाइनेछ । “भिडभाड हुन नदिन अनलाइन टोकन सिस्टमको तयारीमा छौं । सेवाग्राहीले अनलाइनबाट टोकन लिन सक्नेछन् । समय त्यही हुन्छ । सोही समयमा आएर सेवा लिन सक्नेछन्, उनले भने, नलिनेहरु लाइनमा बस्नुपर्छ । अनलाइन टोकन लिएका सेवाग्राही आए भने लाइनमा बसेकाको भन्दा पहिला पालो आउँछ ।”

पौडेलका अनुसार अहिले कार्यालयमा उपलब्ध कर्मचारीबाट नै नविकरणको काम सुरु हुनेछ । लाइसेन्स नविकरणका लागि मात्रै कम्तीमा ६ जना कर्मचारी आवश्यक पर्ने उनले बताए । तर अहिले कार्यालयले यसका लागि चार जना मात्रै कर्मचारीको व्यवस्थापन गर्न सक्ने अवस्था छ ।

मोटरसाइकल नविकरण र बिलिङबाट दुई जना तथा दर्ताबाट एक जना कर्मचारी व्यवस्थापन गरेर लाइसेन्स नविकरणमा खटाईने उनले बताए । लाइसेन्स नविकरणकै लागि हालै मात्र दरबन्दीमा एक जना कम्प्युटर अपरेटर आएका छन् । अहिले चार जनाले नै काम सुरु गर्ने उनको भनाई छ । थप कर्मचारीका लागि मन्त्रालयमा प्रस्ताव गरिएको उनले जानकारी दिए ।

उनका अनुसार आवश्यक परे एक जनालाई दोहोरो जिम्मेवारी दिएरै भए पनि काम सुरु गरिनेछ । “अहिलेले हामी आँफै कर्मचारी व्यवस्थापन गर्छौं । न्युनतम ६ जना चाहिन्छ । मोटरसाइकल नविकरण तथा दर्ताबाट कर्मचारी तानेरै भए पनि काम सुरु गर्छौं । आवश्यक परे एक जनालाई दोहोरो जिम्मेवारी दिएरै भए पनि गर्छौं, उनले भने, थप कर्मचारीका लागि मन्त्रालयमा प्रस्ताव गरेका छौं । उताको कर्मचारी यता गर्दा अरु काम प्रभावित हुने हो कि भन्ने डर चाँही छ । त्यस्तो भयो भने त्यही अनुसार मन्त्रालयमा पहल गर्छौं ।”

बागमती प्रदेशको भौतिक पूर्वाधार विकास मन्त्रालयले भदौ ३ गते यातायात कार्यालय चितवनलाई लाइसेन्स सम्बन्धि सम्पूर्ण काम गर्ने अधिकार दिने निर्णय गरेको थियो ।