नेपालमा एकैदिन १ सय ६७ जना कोरोना संक्रमित थपिएका छन् । पछिल्लो २४ घण्टामा ६ हजार ४ सय ४७ जनामा गरिएको परीक्षणमा १ सय ६७ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । योसँगै नेपालमा कोरोना संक्रमितको संख्या ८ लाख २७ हजार ५८ पुगेको छ ।
मन्त्रालयका अनुसार सोही अवधिमा २ सय २६ जना निको भएसँगै देशभर अहिलेसम्म ८ लाख १० हजार ४ सय ९७ जना संक्रमणमुक्त भएका छन् । कुल संक्रमितमध्ये ९८ प्रतिशत बिरामी निको भएको मन्त्रालयको तथ्याङ्क छ ।
पछिल्लो २४ घण्टामा १ जनाको कोरोनाकै कारण मृत्यु हुँदा अहिलेसम्म मृत्यु हुनेको संख्या ११ हजार ५ सय ८३ पुगेको छ । देशभर ४ हजार ९ सय ७८ जना कोरोना सक्रिय संक्रमित रहेका छन् ।
सोही अवधिमा २ लाख ५५ हजार ४ सय ५८ जनाले कोरोनाविरुद्धको खोप लगाएको मन्त्रालयले जनाएको छ । अहिलेसम्म देशमा ३२ दशमलव ९ प्रतिशत मानिसले पूर्ण खोप लगाइसकेका छन् भने ४३ दशमलव २ प्रतिशतले एक मात्रा खोप लगाएका छन् ।
