भरतपुर । जिल्ला प्रशासन कार्यालय भरतपुरमा सेवाग्राहीको भीड थामिनसक्नु छ । प्रशासनका सवै सेवा क्षेत्रमा सेवाग्राहीको भीड देख्दा कुनै मेलाजस्तो लाग्छ । भीडकै कारण सहज र छिटै पाइने प्रशासनको सेवा पनि ढिला हुने गरेको छ ।

प्रमुख जिल्ला अधिकारी अस्मान तामाङले मतदाता सङ्कलन अभियानका कारण बढी भीड भएको बताए । सीमित स्रोत र साधनका कारण काममा केही असहजता भएको उनको भनाइ छ ।

नागरिकता फाँट, राष्ट्रिय परिचयपत्र फाँट, राहदानी फाँट र प्रशासनमै रहेको मतदाता नामावली सङ्कलन केन्द्रको भीडले सेवा दिन नै मुस्किल परेको छ । मतदाता नामावली सङ्कलन अभियानका कारण नागरिकता बनाउने र मतदाता नामावली भर्नेको भीड बढी छ । नागरिकता बनाउनेको राष्ट्रिय परिचयपत्रसमेत बन्ने हुनाले त्यस क्षेत्रमा पनि भीड हुने गरेको छ ।

मतदाता नामावली सङ्कलन कार्य हरेक स्थानीय तहका केन्द्रमा पनि सञ्चालित छ । तर, नागरिकता बनाउन भरतपुर आएका बखत कतिपयले यही नामावलीमा नाम टिपाउने गरेका छन् ।

नागरिकता बनाउन जिल्लाका पहाडी भेगबाट आएकाहरु भने ढिला सेवा पाउँदा समस्यामा परेका छन् । सरकारले स्थानीय चुनाव र अन्य चुनावको पनि तयारी गरिरहँदा हरेक क्षेत्रका नेता तथा जनप्रतिनिधिहरु आआफ्ना नागरिक लिएर प्रशासनमा धाउने गरेका छन् ।

इच्छाकामना गाउँपालिका वडा नं–५ का वडा अध्यक्ष मोदराज सिलवाल आइतबार जिल्ला प्रशासन कार्यालयमा भेटिए । गाडी नै रिजर्भ गरेर आएका उनी नागरिकता बनाउन सहजताका लागि कार्यालयमा लागिपरेका थिए । इच्छाकामना–१ की काली चेपाङ एकवर्षे बालक काखमा च्यापेर प्रशासनअघि बसिरहेकी थिइन् । वडा अध्यक्षले गाडी रिजर्भ गरेर ल्याएको र सोही गाडीमा फर्कने भन्दै उनी साथीहरु कुरेर बसिरहेकी थिइन् ।

जिल्लाका पहाडी भेगबाट गाडी नै रिजर्भ गरेर नागरिकता बनाउन र मतदाता नामावलीमा नाम समावेश गर्न आउने धेरै छन् । इच्छाकामना, राप्ती, कालिका नगरपालिकाको उपल्लो भेगबाट गाडी नै रिजर्भ गरेर आउनेहरुका कारण पनि प्रशासनमा भीड देखिएको प्रशासनको भनाइ छ । वडा अध्यक्ष र सदस्यहरु नै नागरिकता र मतदाता नामावलीमा नाम समावेश गर्न आफैँ प्रशासनसम्म धाउने गरेका छन् ।

सहायक प्रमुख जिल्ला अधिकारी चुडामणि शर्माले नागरिकताका सम्बन्धमा आउने समस्यालाई सकेसम्म कार्यालयमै मिलाउने गरेको बताए । टाढा–टाढाबाट आउनेहरु सानो काम नहुँदा फर्केर जाने गरेकाले जनताको समस्यालाई बुझेर आफूहरुले काम गरेको उनको भनाइ छ ।