प्रशान्त क्षेत्रीय मुलुक टोंगामा अत्यावश्यक पिउनेपानीलगायत राहत सामग्री बोकेको पहिलो विदेशी विमान अवतरण भएको छ । हालै त्यहाँ भएको शक्तिशाली ज्वालामुखी विस्फोटनका कारण कम्तीमा तीनजनाको ज्यान जानुका साथै हजारौँ विस्थापित भएका थिए ।
न्युजिल्यान्डले स्थानीय कामदारहरूले धावनमार्गबाट खरानी हटाएपछि टोंगाको प्रमुख विमानस्थलमा आफ्नो राहत सामग्री बोकेको सैनिक विमान अवतरण भएको जनाएको छ ।
त्यसैगरी, अन्य विमान र पानीजहाजमार्फत न्युजिल्यान्ड र अष्ट्रेलियबाट पठाइएका राहत सामग्री अझै यात्राका क्रममै रहेका छन् । टोंगाको फोनुआफोउ टापुदेखि करिब ३० किमि दक्षिण–पूर्वमा रहेको हुन्गा–टोंगा–हुन्गा–हापाइ ज्वालामुखी पहाडमा शनिबार ज्वालामुखी विस्फोट भएको थियो । पानीमुनि भएको यो ज्वालामुखी विस्फोट ३० वर्षभन्दा लामो समययता पृथ्वीमा भएको सबैभन्दा ठूलो विस्फोटन हुनुपर्ने विशेषज्ञहरूले दाबी गरेका थिए ।
ज्वालामुखी विस्फोट र त्यसको कारण आएको सुनामी लहरका कारण टोंगाका टापुहरूमा खरानीको बाक्लो तह जम्मा भएको छ । त्यहाँको वायुमन्डललगायत समुद्रको पानी र खरानीका कारण पिउनेपानी पनि दूषित भएका छन् । यस दैवी प्रकोपको पाँच दिनपछि बल्ल टोंगाको बाह्य विश्वसँग सञ्चार सम्पर्क स्थापित भएको छ ।टोंगा पुगेको न्युजिल्यान्डको सी–१३० हर्कुलस विमानमा पानीलगायत अस्थायी बसोबासका सामान, विद्युत् जेनेरेटर, परिवारका लागि अत्यावश्यक वस्तु तथा सञ्चार उपकरणहरू रहेका छन् ।
