चारदेशीय टी–ट्वान्टी सिरिज अन्तर्गत आयोजक ओमानलाई नेपालले ६ विकेटले हराएको छ।
नेपालले १९ ओभर ३ बलमा १३७ रन बनायाे। नेपाललाई जिताउन दिपेन्द्रसिंह ऐरीले अविजित ७३ रनकाे पारी खेले। उनले ५३ बलमा ८ चाैका १ छक्का हिर्काए। यस्तै आरिफ शेखले २० बलमा २५ रनकाे याेगदान दिए । यस्तै ज्ञानेन्द्र मल्लले १६ बलमा १३, आशिफ शेखले ११ बलमा १४ रन जाेडे। ओमानका लागि कलीमुल्लाहले २ विकेट लिएका थिए।
यसअघि निर्धारित २० ओभरमा ओमानले ६ विकेटकाे क्षतिमा १३५ रन बनाएको थियो। नेपाललाई १३६ रनको लक्ष्य चिर्न ४ विकेटको क्षति नै काफी भयो।
ओमानका लागि कप्तान जीशान मकसूदले सर्वाधिक ४३ रन जाेडे। आउट नभइकन उनले ४१ बलमा ४ चाैका र १ छक्का हिर्काए। यस्तै मोहम्मद नदीमले ३१,जतिन्द्र सिंहले १३,शोएब खानले ११, कश्यप प्रजापतिले ११ रन जाेडे। यस्तै अयान खानले पनि ११ रन जाेडे।
नेपालका लागि अविनाश बोहराले ३ विकेट लिए। उनले २.६ ओभरमा केएच प्रजापति, १७.४ ओभरमा मोहम्मद नदीम, र १७.६ ओभरमा नसीम खुशीलाई पेभेलिएन फर्काए। यस्तै कप्तान सन्दीप लामिछानेले १ तथा आरिफ शेख र कमल ऐरीले १-१ विकेट लिए।
म्यान अफ द म्याच दिपेन्द्र सिंह ऐरी
अल अमेरात क्रिकेट ग्राउन्डमा टस जितेर नेपालले पहिले बलिङ गर्ने निर्णय गरेको थियाे। सिरिज अन्तर्गत नेपाल ओमानविरुद्धकाे पहिलो खेलमा विजयी भएकाे छ।
सन्दीप लामिछानेका लागि कप्तानको रुपमा यो पहिलो खेल हो। सिरिजमा आयोजक ओमान, नेपाल, आयरल्यान्ड र युएईको सहभागिता रहेको छ। सिरिज ओमानमै आयोजना हुने आईसीसी टी–ट्वान्टी विश्वकप ग्लोबल छनोटको तयारीको रुपमा रहेको छ।
