धरानका मेयर हर्क साम्पाङले नेकपा एमाले अध्यक्ष केपी शर्मा ओलीको भनाइप्रति टिप्पणी गरेका छन्। शुक्रबार धरानमा आयोजित चुनावी सभामा बोल्दै ओलीले कोशीको पानी धरान ल्याइने बताएका थिए। उनले भनेका थिए, ‘यहाँका मेयरलाई खानेपानीले, खानेपानीले भनेर कतिवटा घैला बोकून् बिचरा?। कसको घरमा खानेपानी पुर्‍याउने?’

उनले धरानमा खानेपानी ल्याउन राष्ट्रिय बजेट र नेकपा एमालेको सरकार चाहिने बताए।

यसकाे जवाफमा मेयर साम्पाङले राष्ट्र के हाे भन्नेसम्म नबुझ्ने अनपढले आफूलाई चुनाैती दिएकाे टिप्पणी गरेका हुन् ।

सामाजिक सञ्जालमा सक्रिय उनले सामाजिक सञ्जाल मार्फत पटक-पटक जवाफ दिँदै आफूलाई कसैले पनि चुनाैति नदिँन आग्रह समेत गरेका छन् ।

‘ग्यासको पाइप घर घरमा पुराएर पानी जहाजमा नेपालीलाई शयर गराउनेले कोशीको पानी ल्याउने गफ दिएछ!’ उनी लेख्छन्,’म ल्याउँछु पानी कोशीको! धेरै चुनौती नदिँदा हुन्छ हाउडेले!’

यस्तै, उनले अर्काे जवाफमा कार्यक्रममा उभिएर भाषणसम्म गर्न नसक्नेले आफूलाई चुनाैति दिएकाे बताएका छन् ।