चितवन १२ मङ्सिर : चितवन–२ बाट नवनिर्वाचित प्रतिनिधिसभा सदस्य तथा राष्ट्रिय स्वतन्त्र पार्टीका सभापति रवि लामछानेले आफू निर्वाचित भएको क्षेत्रमा विद्युत पुग्न बाँकी रहेका स्थानमा अब छिट्टै विद्युत् विस्तार हुने बताएका छन् । साथै उनले जनताले मत दिइसकेछि आफूले काम थालिसकेको बताएका छन् ।
उनी गत बिहीबार भारी मतान्तरले प्रतिनिधिसभा सदस्यमा निर्वाचित भएका थिए ।
सोमबार राति सामाजिक सञ्जालमार्फत आफूले गरेका कामको विवरण सार्वजिक गर्दै लामिछानेले चितवको इच्छाकामना गाउँपालिकाकाे २, ३, ४, ५, ६ र ७ वडाका विद्युत नपुगेका स्थानमा छिट्टै विद्युतीय लाइन विस्तार हुने उल्लेख गरेका छन् ।
साथै उनले चितवनका किसानले वर्षाै देखि भाेगेकाे रासायनिक मलकाे अभाव अन्त्यका लागि आज आफूले कृषि सामग्री कम्पनी लिमिटेड पुगेर मल आयातकाे अवस्था, भण्डारण र वितरणकाे अवस्था निरिक्षण गरेको र दुवै भेटघाट निकै फलदायी बनेको जनाएका छन् ।
आफूहरूले केन्द्रीय राजनीतिलाई पनि नजिकबाट नियालिरहेको जनाउँदै उनले निर्वाचनको सबै मत परिणाम आएपछि उचित निर्णय लिने बताएका छन् ।
