नेकपा माओवादी केन्द्रको आठौं महाधिवेशनको उद्घाटनसत्र अघि अमेरिकी परियोजना (एमसिसी)विरुद्ध नाराबाजी भएको छ। काठमाडौंको कमलादीस्थित प्रज्ञा भवनमा महाधिवेशनको उद्घाटन सत्र सुरु हुनुअघि कार्यकर्ताहरुले एमसिसीविरुद्ध नाराबाजी गरेका हुन्।
‘एमसिसी चाहिँदैन, देश बेच्न पाइँदैन, एमसिसी सम्झौता खारेज गर, एमसिसी धोका हो’ लगायतका नारा लगाइरहेका छन्।
महाधिवेशनको उद्घाटनका लागि अध्यक्ष पुष्पकमल दाहाल प्रचण्डलगायतका नेताहरू हलभित्र प्रवेश गरिसकेका छन् भने अतिथिहरू आउने क्रम सुरु भएको छ।
महाधिवेशनमा माओवादी केन्द्रलाई शुभकामना दिन कांग्रेस सभापति तथा प्रधानमन्त्री शेरबहादुर देउवासमेत आउने कार्यक्रम रहेको छ।
