निराज रानाभाट , चितवन : हरेक वर्ष देवघाटमा आयोजना हुने माघे सङ्क्रान्ति मेलालाई व्यवस्थित पारिने भएको छ । नवलपरासी ( बर्दघाट – सुस्ता पूर्व ) , तनहुँ र चितवन जिल्लाको सीमा क्षेत्रमा पर्ने देवघाटमा हुने मेलालाई व्यवस्थित बनाउन ३ वटै जिल्लाका स्थानीयलाई समेटेर १ सय ५१ सदस्यीय माघे सङ्क्रान्ति मेला मूल व्यवस्थापन समिति गठन गरिएको छ ।
धार्मिक र पर्यटकीय दृष्टिकोणले महत्वपूर्ण रहेको देवघाटधाममा हरेक वर्षको माघे सङ्क्रान्तिमा लाखौँ भक्तजनहरु स्नानका लागि आउने गर्दछन् । स्नानका लागि आउने तीर्थयात्रीहरुको सहजताका लागि यहीँ पुस ३० गते , बिहानैदेखि उक्त स्थानमा सवारीसाधन निषेध गरिएको छ ।
देवघाटको झोलुङ्गे पुल जीर्ण भइसकेकाले सो पुलमा यहीँ पुस ३० गतेदेखि नै सवारीसाधनलाई निषेध गरिने देवघाट क्षेत्र विकास समितिका कार्यकारी निर्देशक धिरनबाबु घिमिरेले जानकारी दिए ।
देवघाटको बेणी सङ्गममा स्नान गर्न चितवन , तनहुँ र नवलपुरबाट जान मिल्ने भए पनि चितवनबाट बाटो सहज हुने भएकाले सोहीअनुसारको यातायात व्यवस्थापन गरिने घिमिरेको भनाइ छ ।
त्रिशूली तथा कालिगण्डकी नदी तरेर सङ्गम स्थल पुग्नका लागि प्रति व्यक्ति ३० भन्दा बढी रुपैयाँ लिन नपाउने गरि क्षेत्र विकास समितिले शुल्क तोकेको घिमिरेले जानकारी दिए ।
देवघाटमा माघे सङ्क्रान्ति स्नानका लागि पुस मसान्तदेखि नै नेपालका विभिन्न जिल्ला तथा छिमेकी देश भारतबाट समेत तीर्थयात्री आउने गरेका छन् ।
गत वर्ष कोरोना कहरका कारण देवघाटमा स्नान गर्न प्रतिबन्ध गरिएकामा यस वर्ष भने देवघाट स्नानलाई व्यवस्थित पारिएको देवघाट क्षेत्र विकास समितिका अध्यक्ष बद्रिप्रसाद अधिकारीले बताए । अधिकारीका अनुसार देवघाट स्नानका लागि बेणी सङ्गम तथा चितवन र नवलपुरको किनारमा क्षेत्र निर्धारण गरिएको छ ।
स्नानका क्रममा कुनै अप्रिय घटना हुन नदिन सशस्त्र प्रहरीको गोताखोर परिचालन गरिने भन्दै अन्य सुरक्षाका लागि तीन वटै जिल्लामा नेपाल प्रहरीका सुरक्षाकर्मी परिचान हुने अधिकारीले बताए ।
मेलालाई व्यवस्थित गर्न २० वटा उपसमिति गठन गरिएको छ । स्वयंसेवक सेवक परिचालन , धुनी व्यवस्थापन , बजार व्यवस्थापन तथा सरसफाइ , खानेपानी व्यवस्थापन , प्राथमिक उपचार , बिजुली बत्ती , डुङ्गा व्यवस्थापनलगायत उपसमिति गठन गरिएका छन ।
