चितवन – चितवनमा राष्ट्रिय परिचयपत्र वितरणको लागि तीन लाख भन्दा बढी विवरण संकलन भएको छ । जिल्ला प्रशासन कार्यालय चितवनका अनुसार हालसम्म तीन लाख २३ हजार दुई सय दुई जनाको विवरण संकलन भएको हो ।
पछिल्लो समय बैदेशिक रोजगारमा जानको लागि पासपोर्ट बनाउन राष्ट्रिय परिचपत्र अनिवार्य गरिएकोले राष्ट्रिय परिचय पत्र बनाउने भिड लाग्ने गरेको कार्यालयका सूचना अधिकारी खेमराज पौडेल बताए ।
ई पास्पोर्ट, नयाँ नागरिकताका लागि राष्ट्रिय परिचयपत्र अनिवार्य गरिएको छ । अहिले दैनिक दुई सय ५० देखि तीन सय सेवाग्राही राष्ट्रिय परिचयपत्रका लागि आउने गरेको उनले बताए ।
चितवनमा २०७६ असार १६ गते देखी राष्ट्रिय परिचयपत्रका लागि विवरण संकलन थालिएको हो । संकलन भएका विवरण मध्ये अहिलेसम्म पाँच सय ७० जनालाई परिचयपत्र वितरण गरिएको छ । गत भदौदेखि चितवन प्रशासनले राष्ट्रिय परिचयपत्र वितरण सुरु गरेको थियो ।
सूचना अधिकारी पौडेलका अनुसार चार हजार राष्ट्रिय परिचयपत्र प्रिन्ट भएर आएको छ । अन्यको आउने प्रकृयामा रहेको उनले बताए । राष्ट्रिय परिचय पत्रको लागि आँखाको रेटिना नापेर लैजानु पर्ने भएकोले वितरणमा ढिलाई भएको उनको भनाइ छ ।
विवरण संकलनका क्रममा आँखाको आकार नलिइएकोले परिचयपत्र आएकाहरूलाई स्वयं उपस्थित गराएर आँखाको आकारको चित्र लिएरमात्रै वितरण गर्दै आएको उनले बताए ।”विवरण दर्ता गरेका सेवाग्राहीको आँखाको रेटिना लिइएको थिएन, त्यसैले हामीले व्यक्ति स्वयंको उपस्थितिमा मात्रै हाम्रो वितरण गरिरहेका छौं”, उनले भने ।
राष्ट्रिय परिचयपत्रमा सबैखालका कागजात समावेश हुने भएकाले यसको महत्त्व रहेको सहायक प्रमुख जिल्ला अधिकारी चिरञ्जीवी शर्माले बताए । बनाउदा सरल, प्रविधिको हिसाबले सुरक्षित र दुरुपयोग गर्न नसक्ने भएकोले हुने हुँदा सबैलाई राष्ट्रिय परिचयपत्र बनाउन उनको आग्रह छ । चितवनका शतप्रतिशत नागरिकको राष्ट्रिय परिचयपत्र बनाउने लक्ष्य रहेको उनले बताए ।
