अस्ट्रेलियाले झण्डै दुई वर्षपछि आफ्नो अन्तर्राष्ट्रिय सीमा खुला गरेको छ। कोरोना भाइरसको महामारीका कारण अस्ट्रेलियाले अन्तर्राष्ट्रिय यात्रुको प्रवेशमा रोक लगाउँदै आएको थियो। अस्ट्रेलियाले सन् २०२० को मार्चदेखि यात्रा प्रतिबन्ध लगाएको थियो।

तर सोमबारदेखि अन्तर्राष्ट्रिय यात्रु अस्ट्रेलिया प्रवेश गर्न पाएका छन्। सोमबार सिड्नी विमानस्थलमा सयौँ अन्तर्राष्ट्रिय यात्रु आएका छन्। झण्डै दुई वर्षपछि कतिपय परिवारका सदस्यबीच पुनर्मिलन भएको छ।

अस्ट्रेलियन तथा केही अरुलाई गएको वर्षको अन्त्यतिरदेखि अस्ट्रेलिया प्रवेश खुला गरिएको थियो। तर अधिकांश विदेशीहरुलाई भने यात्रा प्रतिबन्ध कायम थियो। अन्तर्राष्ट्रिय सीमा खुला भएसँगै अस्ट्रेलियाको पर्यटन व्यवसाय पनि फस्टाउने अपेक्षा गरिएको छ।

अस्ट्रेलियाको नयाँ नियमअनुसार कोरोना भाइरसको पूर्ण मात्रा लगाएकाहरु क्वारेन्टिनमा बस्नु पर्दैन। तर खोप नलगाएकाहरु आफ्नै खर्चमा १४ दिनसम्म होटल क्वारेन्टिनमा बस्नु पर्नेछ।

सोमबार अस्ट्रेलियामा ५० भन्दा बढी अन्तर्राष्ट्रिय विमान अवतरण हुनेछन्। अस्ट्रेलियाको पश्चिमी क्षेत्रबाहेकमा यात्रु प्रवेश गर्न पाउने छन्। पश्चिम अस्ट्रेलिया प्रवेशका लागि खोपको बुस्टर मात्रा पनि लगाएको हुनु पर्नेछ।