सरकार र नेत्रविक्रम चन्द ‘विप्लव’ नेतृत्वकाे नेकपाबीच तीन बुँदे सहमति भएको छ । याेसँगै विप्लव नेकपामाथिको प्रतिबन्ध फुकुवा भएको छ । र, संवादबाट बाँकी विषय हल गरिने सरकारी वार्ता टोलीका सदस्य डा. राजन भट्टराईले जानकारी दिए ।

पक्राउ परेका विप्लव नेकपाका नेता तथा कार्यकर्ताकाे रिहाइ तथा लगाइएका मुद्दा खारेजी गर्ने सहमति दुई पक्षबीच बनेको छ । भट्टराईका अनुसार विप्लव समूह आफ्ना सम्पूर्ण राजनीतिक क्रियाकलाप शान्तिपूर्ण रूपमा सञ्चालन गर्न तयार भएकाे छ । सहमतिको विस्तृत विवरण भोलि संयुक्त पत्रकार सम्मेलनमार्फत गराइने दुवै पक्षले आज जारी गरेको संयुक्त विज्ञप्तिमा जनाइएको छ ।

हिजो दुई चरणमा सरकार-विप्लव समूहबीच वार्ता भएकाे थियाे । सरकारले गृहमन्त्री रामबहादुर थापा ‘बादल’काे संयाेजकत्वमा बुधबार वार्ता टाेली बनाएकाे थियाे । विप्लव समूहले पनि खड्गबहादुर विश्वकर्मा “प्रकाण्ड” र दीपक चलाउनेलाई वार्तामा पठाएकाे थियाे ।

हिंसात्मक गतिविधिमा संलग्न रहेको भन्दै सरकारले २८ फागुन २०७५ मा विप्लव नेतृत्वको नेकपामाथि प्रतिबन्ध लगाएको थियो । यद्यपि, नेकपासँग अनौपचारिक वार्ताका लागि सरकारी प्रयास भने जारी नै थियाे ।  ८ भदौ २०७६ मा पनि विप्लवसँग वार्ता गर्न तत्कालीन पूर्वमन्त्री सोमप्रसाद पाण्डेको नेतृत्वमा वार्ता टोली गठन गरिएकाे थियाे । त्यतिबेला पाण्डेले विप्लवका नेताहरू अनिल शर्मा, चिरन पुन र गुणराज लोहनीसँग वार्ता गरेका थिए ।

साभार: शिलापत्र