नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफ्नाे पार्टी बिग्रेको बताएका छन्।
शहीद रामवृक्ष यादवको २८ औँ स्मृति दिवसको अवसरमा काठमाडौँमा आयोजित एक कार्यक्रममा बाेल्दै उनले आफ्नो पार्टीमा व्यक्ति बादी चरित्र हाबी हुँदै गएका कारण चरित्रमा नराम्रोसँग स्खलन आएको बताएका हुन्।
उनले पार्टी धेरै बिग्रेका कारण क्रान्तिकारी नभएकाे समेत बताए।
कुनै समय पार्टी सानाे भएपनि निष्ठा भएकाे तर अहिले निष्ठा र इमान्दारिता हराउँदै गएकाे अध्यक्ष दाहालकाे भनाइ छ।
‘त्यो बेला सानो थियो, निष्ठावान् थियो। तर, अहिले हाम्रो पार्टी धेरै बिग्रेको छ, हामी क्रान्तिकारी छैनौँ। हामी व्यक्तिवादी भएका छौँ, आत्मकेन्द्रित भएका छौँ। हामी स्वार्थ समूह बनाउनेतिर लागेका छौँ। यसले पार्टीको चरित्रमा नराम्रोसँग स्कलन आएको छ ’, उनले भने।
अध्यक्ष दाहालले पार्टीको दस्तावेजमा क्रान्तिकारी उल्लेख गरे पनि त्यो व्यवहारमा आउन नसकेको उल्लेख गरे।
‘क्रान्तिकारी पार्टी बनाउने भन्ने कुरा विचारमा, किताबमा र दस्तावेजमा छ। हाम्रो दैनिकी क्रान्तिकारी छैन। हाम्रो भनाइ र गराइमा फरक भइरहेको छ’, उनले भने।
