चितवन, भदौं १६ : चितवनमा एक्सपर्ट पब्लिक स्पिकिङ च्याम्पको तेस्रो श्रृङ्खला असोजको पहिलो हप्ताबाट सुरु हुने भएको छ । सन् २०१८ बाट सुरु भएको च्याम्प सन् २०१९ मा दोस्रो श्रृङ्खला भएपछि कोरोनाको कारणले रोकिएको थियो त्यस यता उक्त प्रतिस्पर्धाको तेस्रो अंक यसपटक गर्न लागिएको हो ।

एक्सपर्ट एजुकेसन एण्ड भिसा सर्भिसेज मुख्य प्रायोजक रहेको प्रतिस्पर्धामा विद्यालय तथा क्याम्पसका कक्षा ७ देखि १२ कक्षासम्मका विद्यार्थीहरु सहभागी हुने छन् । प्रतिस्पर्धाको लागि कावासोती, गैँडाकोट, माडी, टाँडी, पर्सा, भरतपुर र पश्चिम चितवनमा हुने प्रारम्भिक छनोटमा छाएिर आएका प्रतिस्पर्धीहरुले फाइनल प्रवेशको लागि विभिन्न राउण्डमा प्रतिस्पर्धा गर्ने छन् ।

पाँच महिनासम्म चल्ने प्रतिस्पर्धामा पहिलो हुने विजेताले ५० हजार रुपैयाँ, दोस्रो हुनेले ३० हजार रुपैयाँ र तेस्रो हुनेले २० हजार रुपैयाँ पाउने आयोजक संस्था विमोचन इभेन्ट एण्ड इन्टरटेनमेन्ट प्रालिका निर्देशक विमोचन आचार्यले हामीलाई जानकारी दिए । पहिलो संस्करणमा आरोमा कलेजका चिन्तामणि सुवेदी पहिलो, वाल्मीकि शिक्षा सदनकी साधना पौडेल दोस्रो र न्यू क्यापिटल कलेजकी ज्योति शर्मा तेस्रो भएका थिए भने दोस्रो श्रृंखलामा अरोमा कलेजका सौगात आचार्य पहिलो, एकता शिशु निकेतनको आशिष बन्जारा दोस्रो र स्काइराइडर स्कुलकी आयुश्मा पोखरेल तेस्रो भएका थिए । प्रतिस्पर्धा सुरुको लागि आवश्यक गृहकार्य भइरहेको आचार्यले बताए ।