चनौलीमा इमर्जेन्सी क्लिनिक भवनको शिलान्यास
चनौली । भरतपुर महानगरपालिका वडा नं–२०, चनौलीमा इमर्जेन्सी क्लिनिक भवनको बुधबार शिलान्यास गरिएको छ ।
नेपाल रेडक्रस सोसाइटी चनौली उपशाखाको सक्रियतामा सञ्चालन हुन लागेको इमर्जेन्सी क्लिनिक भवनको बागमती प्रदेशसभा सदस्य माया श्रेष्ठले शिलान्यास गरेकी हुन् ।
उक्त भवन बागमती प्रदेश सरकारको २२ लाख १३ हजार ९ सय २ रूपैयाँको लगानीमा निर्माण हुनेछ, जसमा २० लाख प्रदेश सरकारको र २ लाख १३ हजार ९ सय २ रूपैयाँ उपभोक्ता समितिबाट बेहोरिने छ ।
भवन निर्माणपश्चात् सो भवनमा दुर्घटनाबाट एवं आकस्मिकरुपमा हुने बिरामीलाई प्राथमिक उपचार, रक्तसञ्चार परामर्श, सामान्य बिरामी उपचार तथा अन्य परामर्शलगायतका सेवाहरु व्यवस्थितरुपमा प्रदान हुने नेपाल रेडक्रस सोसाइटी चनौली उपशाखाका सभापति ओमप्रसाद लामिछानेले बताए ।
एम्बुलेन्स सेवासहितको रात्रिकालीन स्वास्थ्यसेवा दिने र आकस्मिक दुर्घटना भए सेवा लिन सदरमुकाम नै पुग्नुपर्ने भएकोले पश्चिम चितवनका बासिन्दाहरुलाई सो इमर्जेन्सी सेवा उपयोगी हुने उनको दाबी छ।
शिलान्यास गरिएको भवन २ कोठे बन्ने र उक्त भवन असार १५ गतेभित्र निर्माण गरिसक्ने सम्झौता भएको निर्माण उपभोक्ता समितिका अध्यक्ष एकनारयण पौडेलले बताए ।
कार्यक्रममा भरतपुर–१८ का वडा अध्यक्ष बाबुराम राना, नेपाल रेडक्रस सोसाइटी चनौली उपशाखाका पूर्वसभापतिहरु लक्ष्मीकान्त दवाडी, बाबुराम श्रेष्ठ, महेन्द्र श्रेष्ठ, जेएमसी बचत तथा ऋण सहकारी संस्थाका अध्यक्ष महेन्द्र गुरूङ, चनौली बजार समितिका अध्यक्ष हुमनाथ ढकाललगायतको उपस्थिति थियो ।