काठमाडौं। काठमाडौं महानगरपालिकाका मेयर बालेन साहले न्युरोडमा फूटपाथ विस्तार गर्न नपाएको रिस नेकपा (एमाले)अध्यक्ष केपी ओलीमाथि पोखेका छन्।
महानगरले फूटपाथ विस्तारका लागि न्युरोडमा सडक भत्काएको थियो। सडक विभागले उक्त सडक टाल्न थालेपछि मेयर बालेनले आक्रोश व्यक्त गरेका हुन्।
गिरिबन्धु जग्गा प्रकरणबाट जनताको ध्यान हटाउन यस्तो गरिएको बालेनको आरोप छ। सामाजिक सञ्जालमा केपी शर्मा ओलीको नामै किटेर बालेनले जनतालाई नझुक्काउन भनेका छन्।
‘१० हजार करोडको काण्ड लुकाउन अर्को काण्ड गरेर जनता नझुक्काउनु होला माननीय केपी ओलीज्यू। झापा गिरिबन्धुमा बैना लिनेहरूलाई ‘दुई वर्षभित्र गिरिबन्धुकै जग्गा दिलाउँछौं’ भनेर थम्थमाउनु भएछ। गिरिबन्धु चिया बगानको जग्गामा गर्न खोजेको नीतिगत घोटलामा तपाईँको सहभागिताको इतिहास हेर्दा त्यहाँ तपाईँलाई नभनी पात पनि हल्लन्छ भन्ने लाग्दैन,’ बालेनले भनेका छन्।
सोही काण्ड लुकाउन र जनतालाई भुलाउन राज्यको सम्पूर्ण शक्ति लगाएर न्युरोडमा बनाउन लागेको फूटपाथमा फेरि सडक बनाउनु थालेको बालेनको आरोप छ।
उनले भनेका छन्, ‘अब बल्ल देश बन्ने भएछ। आफ्ना कर्तुत लुकाउन र विषयान्तर गरे पनि काम हुनु राम्रो हो। तपाईंको शक्तिले अब रिङरोड बनाउनु, बुटवल चितवन बाटो बनाउनु, यस्ता धेरै आयोजनामा लगाउनुहोला। हामी साथमा छौँ।’
समयमै गिरिबन्धुका पीडितको बैना पनि फिर्ता गर्न बालेनले ओलीलाई भनेका छन्।
उनले भने, ‘नत्र कोही साँच्चैको नयाँ आउला र फाइल पल्टाउला। हुन त, पहिले पनि जेल बस्नु भएको हो।’
बालेनले यसअघि पनि न्युरोडको फूटपाथ विस्तार गर्न नपाएको रिसमा सडक विभाग र सडक डिभिजन कार्यालय काठमाडौंको गेट धुलो थुपारिदिएका थिए। यद्यपि, उनले रिङरोड विस्तारमा ढिलाइ भएको भन्दै जनताले सास्ती खेप्नु परेकाले यस्तो गरिएको बताएका थिए।
