काठमाडौं । टिकटकले ३२ जनासम्मको समूहलाई समेटेर च्याट गर्ने सुविधा थप गरेको छ । यो नयाँ सुविधाले मेसेन्जर र ह्वाट्सएपजस्ता लोकप्रिय मेसेजिङ एपलाई चुनौतीका रूपमा उभ्याउन सक्ने अनुमान गरिएको छ । टिकटकको यो सुविधा १६ वर्षभन्दा माथिका प्रयोगकर्ताहरुका लागि उपलब्ध छ । यसबाट प्रयोगकर्ताहरूबीच च्याट गर्न तथा भिडियोहरू आफ्ना साथी र परिवारका सदस्यहरूलाई आदानप्रदान गर्न सकिन्छ । यसअघि टिकटक भिडियो आफन्त, साथीभाइलाई पठाउन अन्य मेसेजिङ एपहरूको सहारा लिनु पर्ने झन्झट थियो । अब टिकटकले आफ्नै प्लेटफर्ममा यो सुविधा उपलब्ध गराएर प्रयोगकर्ताहरूलाई भिडियो हेर्ने, कमेन्ट गर्ने तथा प्रतिक्रिया जनाउने मौका दिने छ । ग्रुप च्याट शुरु गर्न प्रयोगकर्ताहरुले इनबक्सको माथि रहेको ‘ च्याट ’ बटनमा ट्याप गर्नुपर्छ । त्यसपछि ३१ जनासम्म साथीहरू छानी ‘ स्टार्ट ग्रुप च्याट ’ मा ट्याप गरेर ग्रुप च्याट शुरु गर्न सकिन्छ ।
यदि ‘ इन्भिटेसन ’ मार्फत ग्रुप च्याटमा सामेल हुन चाहनुहुन्छ भने ‘ इन्भिटेसन ’ मा ट्याप गरेर ‘ ज्वाइन ग्रुप ’ मा ट्याप गर्नुपर्छ । टिकटकको ग्रुप च्याटमा जोडिन त्यहाँ भएकाहरूमध्ये १ जनासँग भए पनि म्युचुअल फ्रेन्ड भएको हुनुपर्ने बताइएको छ । १८ वर्ष मुनिका प्रयोगकर्ताहरुका लागि ग्रुपमा सहभागी हुन थप नियमहरू लागू हुने छन् । उनीहरूले आफ्नो ग्रुपमा सामेल हुने व्यक्तिहरूलाई एसेप्ट गर्नु पर्ने छ । यो नयाँ सुविधामार्फत कम्पनीले टिकटकलाई केवल मनोरञ्जनको प्लेटफर्ममा मात्र सीमित नराखी साथीहरूसँग कुराकानी गर्ने सामाजिक प्लेटफर्मका रूपमा पनि स्थापित गर्न खोजेको देखिन्छ । यसैबीच, टिकटकले डाइरेक्ट मेसेजेज फिचरमा कस्टम स्टिकरहरू क्रियट गर्न तथा शेयर गर्न मिल्ने अर्को सुविधा पनि थप्ने तयारी गरेको छ ।
