माडी । विपिन पाठकको कवितासङ्ग्रह ‘मरुभूमिमा वासन्ती याम’ लोकार्पण गरिएको छ । शुक्रबार चितवनको माडीस्थित पर्यटकीयस्थल रातोमाटे डाँडामा पाठकको पहिलो कविता कृति लोकार्पण गरिएको हो ।

माडी साहित्य परिवारले आयोजना गरेको कार्यक्रममा चितवन, मकवानपुर, नवलपरासी र कैलालीका साहित्यसर्जकहरूको उपस्थितिमा कृति लोकर्पण गरिएको हो । माडी साहित्य परिवारका अध्यक्ष चन्द्रमणि महतो, माडी नगरपालिका प्रमुख ताराकुमारी काजी महतो, कवि पाठकका बुबाआमा बालकृष्ण र पार्वती पाठक, कवि भूपिन, युवा नेता रामप्रसाद न्यौपानेलगायतबाट सो पुस्तकको लोकार्पण भएको हो ।

लेखकको व्यक्तित्व एवं कृतिका सन्दर्भमा डा. धनेश्वर भट्टराईले चर्चा गर्दै कवि पाठक कवितामा गहिरो रुचि भएको व्यक्ति भएको बताउनुभयो । त्यसैगरी लेखक भूपिनले भन्नुभयो- ‘कविता लेखनमा विपिन लोभलाग्दो किसिमबाट आएका छन्, उनले कविता बुझेका छन्, अझै स्तरीय कविता लेखेर आउनुपर्ने चुनौती यस सङ्ग्रहले दिएको छ ।’

कार्यक्रममा कवि पोषराज पौडेल, बुद्धिजीवी प्रेम रिमाल, युवा राजनीतिज्ञ रामप्रसाद न्यौपाने, साहित्य सङ्गम चितवनका अध्यक्ष प्रकाश चापागाईं, मकवानपुर हेटौंडाका कवि पुरुषोत्तम आचार्यलगायतले शुभकामना मन्तव्य राख्नु भयो । सीमान्तकृतको आवाज, असमानताप्रतिको विद्रोह, कर्मीवर्गप्रतिको विशेष प्रेम, राजनीतिक विचलन, सुशासनका लागि खबरदारी, प्रकृति र वातावरण संरक्षणलगायतका कविता सङ्ग्रहमा समेटिएका छन् ।

कवि विपिनले आफू माडीको सामान्य परिवारमा जन्मिएको र सोही ठाउँको सामान्य समाजको संगतमा बसेकोले आफ्ना कवितामा पनि समाजका सामान्य कुरा समेटिएको बताउनुभयो । ६० को दशकदेखि कविता लेखनमा सक्रिय उहाँ समाज, समसामयिक परिवेश र प्रकृतिलाई केन्द्रमा राखेर सिर्जना गर्न रुचाउनुहुन्छ । प्रगतिशील लेखक संघ चितवन शाखाका पूर्वअध्यक्ष कवि पाठक साहित्य सङ्गम चितवनका पूर्व सहसचिव पनि हुनुहुन्छ ।

माडीसहित विभिन्न एफएम रेडियोमा साहित्यिक कार्यक्रम सञ्चालनको अनुभव बटुलेका पाठक शिक्षक सेवा तथा लोक सेवा आयोगका कक्षाहरु सञ्चालन समेत गर्ने पाठक विश्वप्रकाश मावि भरतपुरमा अध्यापन गराउनुहुन्छ । उहाँले त्रिभुवन विश्वविद्यालयबाट नेपाली विषयमा स्नातकोत्तर तथा नेपाल ल क्याम्पसबाट कानून विषयमा स्नातक गर्नुभएको छ ।