शनिवार, मार्च १५ | अष्ट्रेलियाको न्यु साउथ वेल्स राज्यको न्यु इंग्ल्याण्ड क्षेत्रमा पर्ने ट्यामवर्थमा भव्यताका साथ होली पर्वको आयोजना भएको छ। नेपालमा विहिवार मनाइने होली कार्यव्यस्तताका कारण शनिवार नेप्लिज इन ट्यामवर्थ इन्कर्पोरेटेडको आयोजनामा होली पर्व राखिएको कार्यक्रमका संयोजक मुक्ति चालिसेले जानकारी दिनुभयो।
नेपाली, भारतीय र अस्ट्रेलियन समुदायका १५० भन्दा बढी सहभागीहरूले यस कार्यक्रमलाई रंगीन बनाएका थिए। कार्यक्रम दिउँसो ३ बजे सुरु भई साँझ ७ बजेसम्म चलेको थियो।
कार्यक्रममा बार्बेक्यू, नृत्य, संगीत र विभिन्न खेलकुद गतिविधिहरू समावेश गरिएको थियो। सहभागीहरूले एकआपसमा रंग लगाउँदै, नाचगान गर्दै होली पर्वको मजा लिएका थिए। कार्यक्रमको संयोजक चालिसेका अनुसार स्वयंसेवकहरूले कार्यक्रम सफल बनाउन योगदान दिएका थिए। यो उत्सवले विभिन्न समुदायका मानिसहरूलाई एकसाथ ल्याई आपसी सद्भाव र मेलमिलापको सन्देश प्रवाह गरेको छ।
नेपालबाट आउनुभएका बाबुआमा र बच्चाहरू पनि कार्यक्रममा आनन्द लिइरहेका थिए। अष्ट्रेलियामा जन्मिएका नयाँ पुस्तालाई पनि यो कार्यक्रमले संस्कृतिक दुरी कम गर्नमा पनि महत्वपूर्ण भूमिका खेलेको उनले बताए।
