आइतबार काठमाडौंको नयाँ बानेश्वरमा भएको शिक्षक आन्दोलनको क्रममा घाइते भएकी पत्रकार सबिना कार्कीको दुबै आँखामा गहिरो चोट लागेको छ। हाल उनी तिलगंगा आँखा अस्पतालमा उपचाररत छिन्। उपचारमा संलग्न डाक्टरका अनुसार, चोटका कारण दुबै आँखाको लेन्स सुन्निएको छ र आँखाभित्र रगत जमेको छ, जसले गर्दा उनको देख्ने क्षमता निकै कम भएको छ।

डाक्टर सिभान्त श्रेष्ठका अनुसार, आँखामा चोट लाग्दा प्रेसर पनि बढेको छ। भिडियो एक्सरेमा पर्दा च्यातिएको देखिएको छैन तर आँखाभित्र रगत जम्दा र सुन्निँदा दृष्टिमा समस्या आएको छ। आँखाको नानी वरिपरिका भागहरू प्रष्टसँग नदेखिएको चिकित्सकले बताएका छन्।

सीटी स्क्यानमार्फत थप जाँच गर्ने तयारी भइरहेको छ। डा. श्रेष्ठका अनुसार, “उहाँलाई अहिले नर्मल भन्न मिल्दैन, किनभने आँखाको भिजन एकदमै कम छ। पछाडि पर्दामा धेरै चोट लागेको भए उपचारमा लामो समय लाग्न सक्छ।”

कार्कीको अवस्था गम्भीर रहेको अस्पताल स्रोतले जनाएको छ। उनको उपचार र स्वास्थ्य अवस्थाबारे थप अवलोकन आवश्यक रहेको चिकित्सकहरूले बताएका छन्।