काठमाडौं — सरकारविरुद्ध सामाजिक सञ्जाल प्रतिबन्ध र भ्रष्टाचारको विषयमा प्रदर्शन गरिरहेका जेन जी युवाहरू आक्रामक बनेपछि जिल्ला प्रशासन कार्यालय काठमाडौंले बानेश्वर क्षेत्रमा कर्फ्यु आदेश जारी गरेको छ। प्रमुख जिल्ला अधिकारी छविलाल रिजालले स्थानीय प्रशासन ऐन २०२८ को दफा ६ अन्तर्गत सोमबार दिउँसो १२:३० बजेदेखि राति १० बजेसम्म कर्फ्यु आदेश जारी गरेका हुन् ।
प्रदर्शनकारीहरूले संघीय संसद् भवनको सुरक्षा व्यवस्था तोडेर निषेधित क्षेत्रमा प्रवेश गरेपछि प्रहरीले पानीको फोहरा, अश्रुग्यास, रबर बुलेट र सीधा गोली चलाएको थियो। यस घटनामा अहिलेसम्म १४ जना प्रदर्शनकारीको मृत्यु भएको र १०० भन्दा बढी घाइते भएको विभिन्न अस्पतालले पुष्टि गरेको छ ।
मृत्यु भएकाहरूको विवरण:
ट्रमा सेन्टरमा ६ जना
सिभिल अस्पतालमा ३ जना
एभरेस्ट अस्पतालमा ३ जना
काठमाडौं मेडिकल कलेजमा १ जना
त्रिभुवन विश्वविद्यालय शिक्षण अस्पतालमा १ जना
ट्रमा सेन्टरका डाक्टर दिपेन्द्र पाण्डेयका अनुसार १० जना प्रदर्शनकारी अत्यन्त गम्भीर अवस्थामा छन्, जसमध्ये केहीको टाउको र छातीमा गोली लागेको छ। २० भन्दा बढी अन्य घाइतेहरूको उपचार भइरहेको छ ।
प्रदर्शनका क्रममा पत्रकारहरू समेत घाइते भएका छन्। नयाँ पत्रिकाका दिपेन्द्र ढुंगाना, नेपाल प्रेसका उमेश कार्की र कान्तिपुर टेलिभिजनका श्याम श्रेष्ठलाई रबर बुलेट लागेर घाइते भएका छन् ।
कर्फ्यु क्षेत्र विस्तार गर्दै राष्ट्रपति निवास शीतलनिवास, उपराष्ट्रपति निवास लैनचौर, प्रधानमन्त्री निवास बालुवाटार, सिंहदरबारका सबै क्षेत्रमा समेत कर्फ्यु लागू गरिएको छ। यी क्षेत्रहरूमा आवतजावत, भेलाघाट, जुलुस र प्रदर्शनमा पूर्ण प्रतिबन्ध लगाइएको छ ।
कर्फ्यु आदेश कार्यान्वयन गर्न नेपाली सेनालाई समेत परिचालन गरिएको छ। नयाँ बानेश्वर क्षेत्रमा पुगेको सेनाले प्रहरीसँग मिलेर सुरक्षा व्यवस्था मिलाउने काम गरिरहेको छ ।
आन्दोलनकारी संगठन ‘जेन जी नेपाल’ले संसद् भवनमा प्रवेश गर्ने व्यक्तिहरू आफ्ना नभएको स्पष्ट पारेको छ। प्रदर्शनकारीहरूले ‘भ्रष्टाचार बन्द गर’, ‘सामाजिक सञ्जाल खोल’, ‘युवा भ्रष्टाचारविरुद्ध’जस्ता नारा लगाउँदै सरकारको नीतिको विरोध गरेका छन्।
सरकारले गत शुक्रबारदेखि फेसबुक, इन्स्टाग्राम, युट्युब, व्हाट्सएप, एक्स (ट्विटर)लगायत २६ सामाजिक सञ्जाल प्लेटफर्म बन्द गरेको छ। पोखरा, बुटवल, चितवन, बिराटनगर, झापाको दमकलगायत अन्य सहरहरूमा समेत समर्थनमा प्रदर्शन भएको छ ।
प्रधानमन्त्री केपी शर्मा ओलीले साँझ आकस्मिक मन्त्रिपरिषद् बैठक बोलाएका छन् ।
