प्रधानमन्त्री केपी शर्मा ओलीद्वारा पदबाट औपचारिक राजीनामा दिएलगत्तै काठमाडौं महानगरपालिकाका प्रमुख बालेन्द्र शाह (बालेन) ले सम्पूर्ण जेन जेड पुस्तालाई शान्ति र संयमित हुन विशेष अपिल गरेका छन्। सामाजिक सञ्जालमा सार्वजनिक सन्देशमा उनले भने, “यो नितान्त Gen Z को आन्दोलन हो। तपाईंहरूको हत्याराको राजीनामा आइसकेको छ, अब संयमित हुनुहोला। देशको जनधनको क्षति तपाईं-हाम्रो संपत्तिको क्षति हो, त्यसैले अब संयमता जरुरी छ। अब नेतृत्व तपाईंको पुस्ताले गर्नुपर्छ, तयार रहनुहोस।”

बालेनले संसद् विघटनपश्चात मात्रै सेना प्रमुखसँग वार्ताका लागि तयार रहन आग्रह गरेका छन् र राष्ट्रिय सम्पत्ति, शान्ति तथा सरोकारका विषयमा कुनै पनि उत्तेजना वा हिंसा नगर्न पुनः स्पष्ट रुपमा आग्रह गरेका छन्। उनले देशको भावी नेतृत्व युवापुस्ताको हातमा आएको उल्लेख गर्दै अब शान्तिपूर्ण र जिम्मेवार हस्तान्तरण अपरिहार्य भएको बताए।

ओलीको राजीनामा, कर्फ्यु, कडाइ, र देशव्यापी राजीनामाका बीच बालेन शाहको संयमताको अपिलले आन्दोलनलाई लोकतान्त्रिक, शान्तिपूर्ण र सकारात्मक बाटोतर्फ अघि बढाउने सन्देश दिएको छ।