सरकारले गाईजात्रामाभदौ ७ गते सोमबार काठमाडौं उपत्यकाभरि र देशभरिका नेवार समुदायलाई सार्वजनिक बिदा दिने निर्णय गरेको छ।

यसका साथै मन्त्रिपरिषदको बिहीबार बसेको बैठकले भदौ १४ गते श्रीकृष्ण जन्माष्टमीमा पनि सार्वजनिक बिदा दिने निर्णय गरेको सरकारका प्रवक्ता ज्ञानेन्द्रबहादुर कार्कीले बताए।

बैठकले काठमाडौं– तराई/मधेश द्रुतमार्ग आयोजनाका लागि आवश्यक विभिन्न सहायक संरचना निर्माण गर्न मकवानपुर जिल्लाको कालभैरव सामुदायिक वन र गौरीशंकर सामुदायिक वनमा ५ दशमलव २२ हेक्टर थप वन क्षेत्र प्रयोग गर्न र त्यहाँ रहेका रुख हटाउन स्वीकृति दिने निर्णय पनि गरेको छ।

त्यसैगरी सहसचिव डिल्लीराम शर्मालाई विशिष्ट श्रेणीमा बढुवा गरेको तथा नेपाल टेलिभिजनका कार्यकारी अध्यक्ष डा. महेन्द्र विष्टले दिएको राजीनामा स्वीकृत गर्ने निर्णय गरेको प्रवक्ता कार्कीले बताए।

मन्त्रिपरिषदले सिँचाइ र ऊर्जा मन्त्रालयका केही वरिष्ठ इन्जिनियरलाई द्वितीय श्रेणीबाट प्रथम श्रेणीमा बढुवा गरेको पनि उनले जानकारी दिए।

Photo Credit: icicles