देशव्यापी रुपमा कांग्रेसको चौधौं महाधिवेशनले माहोल तातिरहेको छ। स्थानीय वडा, क्षेत्र, जिल्ला, प्रदेश र केन्द्रमा गरेर आजबाट औपचारिक रुपमा सहमति र चुनावको आधारमा पार्टीका नेताहरु मनोनित/ निर्वाचित भएका छन्।

यसरी चितवनमा पनि वडा तहमा २२ गते निर्वाचन हुँदैछ भने क्रमश: क्षेत्र र जिल्लामा पनि निर्वाचन हुने नेपाली कांग्रेस जिल्ला कार्यसमितिले जनाएको छ। लामो समय देखि बिद्यार्थी राजनीतिबाट राजनैतिक यात्रा सुरुवात गरेका हालका नेपाल बिद्यार्थी संघ चितवनका अध्यक्ष सुर्य ढकालले नेपाली कांग्रेसको जिल्ला सचिवमा उम्मेद्वारी दिने घोषणा गरेका छन्।

हामी संग कुरा गर्दै युवा नेता ढकालले भन्नुभयो २०५८ देखि २०७० सम्म केन्द्रिय राजनीतिमा भिजेर काम गरेर आएको साथै पछिल्लो ९ वर्षदेखि नेविसंघ चितवन जिल्ला अध्यक्ष जस्तो गरिमामय पदमा बसेर कार्य गर्दैगर्दा चितवनका हरेक कुनाकाप्चा देखि यहाँको राजनैतिक वस्तुस्थितिलाई नजिकबाट नियाल्न पाएको पनि उनले बताए। उनका अनुसार भोलि नेपाली कांग्रेस चितवनको सचिव पदमा विजयी हुँदा होस् या नहुँदा पनि स्थानीय तह, जिल्ला तह र केन्द्रिय राजनीतिको पुलको काम गर्ने पनि उनले बताए।

कोहि कसैलाई केहि अफ्ट्यारो पर्दा अथवा अन्य केहि काम पर्दा सिधा जिल्ला र केन्द्रिय तहबीचको समन्वय गरि हरेक समस्याको समाधान गर्न पनि आफ्नो तर्फबाट सक्दो पहल गर्ने पनि उनले जिकिर गरे। युवा विद्यार्थी साथीहरु तथा पार्टीका हरेक शुभचिन्तकहरुसंग सिधा सम्पर्क स्थापना गर्नका लागि “हेल्लो अभियान” को सुरुवात गर्ने उनले बताए। उनले उदाहरण दिंदै कुनै एउटा युवाले माडीबाट सहयोगको आशामा फोन गरोस वा पुर्वचितवन देखि कुनै प्रशासनिक सहयोगको लागि फोन गरोस उसको समस्या समाधान गर्नको लागि सर्वप्रथम “हेल्लो अभियान” को मार्फत सम्पर्क हुने वातावरण बनाउने र सक्दो धेरैलाई सहयोग गर्ने पनि उनले बताए। बिहान देखि साँझसम्म आफ्ना कार्यकर्ताको सेवामा नै आफुलाई तल्लिन बनाउँदै आएको र त्यस्लाई फेरी निरन्तरता दिने पनि उनले बताए। आफ्ना कार्यकर्ता र जनसमुदायको हितमा नै आफुलाई समाहित गर्दै युवा वर्ग लक्षित गरेर युवा राजनीति संगसंगै उद्यमशिलतामा पनि केन्द्रित गराउन “उद्यमशिल अभियान ” संचालन गरेर अगाडी बढ्ने योजना रहेको पनि हामीलाई जानकारी गराएका छन्।

देशमा उद्यमशीलताको अवसर नहुनाले युवा जनशक्तिहरुको देश छोडेर जाने क्रम बढेकोले देश सुहाउँदो र देशमै केहि गर्न सकिनेछ भन्ने सोचको विकास गर्ने योजना रहेको पनि उनले हामीलाई बताएका छन्।

उनले भने आफू नेपाली कांग्रेसको जिल्ला सचिव हुँदै गर्दा आधुनिक युग सुहाउँदो पार्टी बनाउनको लागि प्रविधिमैत्री एवम् सशक्त पार्टी निर्माणका लागि अनुशासित जनशक्ति परिचालन तयारि गरि नेपाली कांग्रेस चितवनलाई नम्बर एक पार्टी बनाउने संकल्प पनि गरेका छन्। पार्टी संगठन कस्तो हुनुपर्छ भनेर हेर्न र बुझ्नको लागि देशभरिका कांग्रेस जनलाई चितवन एउटा उधारणीय थलो बनाउनका लागि मेरो सचिव पदको उम्मेदवार भएको उनले बताएका छन्।