चितवनका विभिन्न फार्मेसी तथा पोलीक्लिनिकहरुमा अस्ति आइतबार र आज मंगलबार अनुगमन टोलि खटिएको छ । जिल्ला प्रशासन कार्यालयका सहायक प्रमुख जिल्ला अधिकारीको नेतृत्वमा जिल्ला स्वास्थ्य कार्यालय, घरेलु तथा साना उद्योग कार्यालय, प्रहरी लगायतको संयुक्त टोलीले आज ६ वटा मेडिकल, पोलिक्लिनिक तथा डेन्टलको अनुगमन गरेको हो ।
अनुगमनको क्रममा रत्ननगर नगरपालिका वडा नम्बर २ टाँडीको एउटा डेन्टल सिल नै गरेर बन्द गरिएको छ । टाँडी चोकको साइबाबा डेन्टल प्रा.लिको सञ्चालक नभेटिएको, प्रा.लि २ वर्षदेखि नवीकरण नै नगरी सञ्चालन भएको, मापदण्ड अनुसारको पूर्वाधार नभएको, कर्मचारीको नियुक्तीपत्र नभएको भन्दै सिल नै गरेर बन्द गरिएको जिल्ला प्रशासन कार्यालय चितवनका सहायक प्रमुख जिल्ला अधिकारी चिरञ्जवी शर्माले जानकारी दिएका छन् ।

त्यस्तै रत्ननगरकै रत्न फर्मा र नोपल फर्मामा म्याद गुज्रेको औषधि बिक्री वितरणको लागि राखेको भेटिएकोले तत्कालको लागि बन्द गरिएको छ । उनीहरुलाई म्याद गुज्रेका औषधि छुट्याएर जिल्ला प्रशासन कार्यालयमा उपस्थित हुन आदेश दिएको सहायक प्रमुख जिल्ला अधिकारी शर्माले बताए । त्यस्तै रत्ननगर मेडिसिन सेन्टरमा फर्मासिस्टको आवश्यक कागजपत्र देखाउन नसेकोकोले आवश्यक कागजपत्र लिएर कार्यालयमा उपस्थित हुन भनिएको र त्यति बेलासम्म फार्मेसी बन्द गर्न भनिएको शर्माले बताए ।

अस्ति आइतबार भरतपुर स्थित प्रगति पोलिक्लिनिकको फार्मेसी पनि दर्ता नभएको भेटिएपछी जिल्ला प्रशासन कार्यालयमा उपस्थितिको लागि पत्र पनि काटिएको जानकारी दिएका छन् भने आज दोस्रो दिन भरतपुरको सामान्था मेडिकल हलमा अनुगमनको क्रममा नार्कोटिक औषधिको अभिलेख व्यवस्थित नभएकोले व्यवस्थित गर्न निर्देशन दिएको थियो ।

चितवनमा पछिल्लो समय पसल दर्ता नगरी फार्मेसी संचालन गर्नेको संख्या बढ्दै गएकाले अनुगमन गर्न सहायक जिल्ला प्रमुखको संयोजनमा जम्बो टोलि गठन भएको जानकारी पनि दिए। अनुगमन टोलीमा घरेलु तथा साना उद्योग कार्यालयका प्रमुख यादवनाथ आचार्य, स्वास्थ्य कार्यालय चितवनका शिवप्रसाद शर्मा, भरतपुर महानगरपालिकाकी स्टाफ नर्स अधिकृत रुपमती आले, भरतपुर अस्पतालका फार्मेसी सुपरभाइजर सबिन लामिछाने, जिल्ला प्रहरी कार्यालय चितवनका प्रहरी नायब उपरीक्षक सूर्यबहादुर थापा, सशस्त्र प्रहरी नायब उपरीक्षक नवीन कुमार अग्रहरी, उपभोक्ता अधिकार संरक्षण मञ्चका उपाध्यक्ष विष्णु भुषालको सहभागिता रहेको थियो ।

फोटो : सांकेतिक