राष्ट्रिय प्रजातन्त्र पार्टीले एकतापछिको पहिलो महाधिवेशन सुरु गरेको छ । यो महाधिवेशनले आगामी चार बर्षका लागि नेतृत्व चयन गर्नेछ । जसका लागि अध्यक्ष कमल थापा र नेता राजेन्द्र लिङदेन चुनावी मैदानमा होमिएका छन् ।
राष्ट्रिय प्रजातन्त्र पार्टीको आगामी नेतृत्वका लागि दावी गरिरहेका दुई नेता कमल थापा र राजेन्द्र लिङदेनले आफ्नो प्यानल टुंग्याएका छन् ।प्रतिनिधको भोटबाट निर्वाचित हुने ४ उपाध्यक्ष र तीन महामन्त्रीका लागि उनीहरुले आफ्ना उम्मेदवार छानेका हुन् । थापा र लिङदेन दुवैका प्यानलमा एउटा साझा नाम देखिएको छ ।
दुवैले उपाध्यक्षमा प्रस्तावित गरेका उनी हुन् विक्रम पाण्डे । अहिलेसम्म कुनै पनि गुटमा नखुलेका पाण्डेलाई दुवै समूहले आफ्नो दावी गरेका हुन् । दुवै गुटका साझा देखिएपछि पाण्डेको उपाध्यक्षमा सम्भावना बलियो बनेको छ ।
कमल थापाको प्यानलबाट पाण्डेसहित ध्रुवबहादुर प्रधान र बुद्धिमान तामाङ पुरुष उपाध्यक्षका उम्मेदवार तय भएका छन् । महिला उपाध्यक्षको कोटामा रोशन कार्कीलाई सो समुहले फाइनल गरेको बुझिएको छ । यसैगरि, महामन्त्रीमा भुवन पाठक, भाष्कर भद्रा र कुन्ती शाही थापा प्यानलबाट उठ्ने भएका छन् ।
शाहीले महिला महामन्त्रीको कोटामा लड्न लागेकी हुन् । उनको भिडन्त लिङदेन गुटकी उम्मेदवार रेखा थापासँग हुने छ । पाण्डे चितवनका प्रभावशाली नेता हुन । १५ बर्षदेखि पार्टीमा राजकाज चलाएका थापा पुनः नेतृत्वमा दोहोरिने तयारी गरेका छन् । लिङदेन भने राप्रपाको एकमात्र जननिर्वाचित प्रतिनिधिसभा सदस्य हुन् ।
संसदमा राप्रपाको एक सीट छ, त्यो लिङदेनकै नाममा दर्ता छ । युवा र जनताले पनि पत्याएको । फलतः उनी आफु नै अध्यक्ष हुनुपर्ने दाबी गरिरहेका छन् । उनले थापालाई समयको पदचाप बुझ्दै अध्यक्षको दौडबाट पछि हट्न आग्रह समेत गरेका छन् ।
