चितवन । स्क्याबल हब चितवनको आयोजनामा स्वर्गीय ओमराज मैनालीको स्मृतिमा आयोजित दोस्रो जिल्ला स्तरीय स्क्याबल प्रतियोगिता सम्पन्न भएको छ।
नारायणी इङ्लिस पब्लिक स्कुलको परिसरमा सम्पन्न प्रतियोगितामा चितवन जिल्लाका १३ विद्यालयबाट २६ जना विद्यार्थीले सहभागिता जनाएका थिए।
कार्यक्रमको अध्यक्षता नारायणी इङ्लिस पब्लिक स्कुलका प्राचार्य वेदराज न्यौपानेले गर्नुभएको थियो। कार्यक्रममा प्रमुख अतिथिका रूपमा बेस भरतपुरका अध्यक्ष शिव केसी तथा अतिथिका रूपमा ओएस्पा युवा समितिका पर्यवेक्षक अर्जुन पाण्डे, स्वर्गीय ओमराज मैनालीकी श्रीमती गीता घिमिरे र इस्टु चितवनका अध्यक्ष दिवाकर पौड्यालको उपस्थिति रहेको थियो।
कार्यक्रमलाई सम्बोधन गर्दै प्रमुख अतिथि शिव केसीले स्क्याबल अंग्रेजी शब्द निर्माणमा आधारित खेल भएकाले यसले विद्यार्थीहरूको शब्द निर्माण गर्ने क्षमता तथा भाषिक दक्षताको विकासमा महत्वपूर्ण भूमिका खेल्ने बताउनुभयो। उहाँले विद्यार्थीहरूले यस्ता खेलमा सहभागी हुनुपर्नेमा जोड दिनुभयो।
सात चरणमा सञ्चालन गरिएको प्रतियोगितामा उत्कृष्ट प्रदर्शन गर्दै अङ्कुरम एकेडेमीका निराजन पौडेल प्रथम, नारायणी इङ्लिस पब्लिक स्कुलकी आध्याश्री मल्ल द्वितीय र अर्किड स्कुलका सुजल बस्याल तृतीय भएका छन्।
प्रतियोगितामा सहभागी विद्यार्थीमध्ये उत्कृष्ट छ स्थान हासिल गर्ने विद्यार्थीहरू बुटवलमा आयोजना हुने राष्ट्रिय स्क्याबल प्रतियोगिताका लागि छनोट हुने स्क्याबल हब चितवनका संयोजक प्रकाश सिग्देलले जानकारी दिनुभयो।
स्क्याबल खेलले विद्यार्थीहरूमा अंग्रेजी शब्दभण्डार, सोच्ने क्षमता, एकाग्रता तथा शब्द निर्माण गर्ने सीप विकास गर्न सहयोग पुर्‍याउने आयोजकले जनाएको छ।