जनता समाजवादी पार्टी (जसपा) ले आज पत्रकार सम्मेलन गर्दैछ । दिउँसो पार्टी कार्यालयमा पत्रकार सम्मेलन गरेर १७ वर्षअघिको गौर हत्याकाण्डको विषयमा धारणा राख्नेछ । गृहमन्त्रालय र गौरहत्या काण्डका पीडितहरू बीच गत मंगलबार भएको पाँच बुँदे सहमतिले जसपा तरंगित भएको छ ।
उक्त तरंगपछि जसपाले पत्रकार सम्मेलन गर्न लागेको हो । तत्कालीन मधेशी जनअधिकार फोरम र माओवादीका कार्यकर्ताबीच भएको झडपमा २७ जनाको ज्यान गएको थियो । फोरमले गौरको राइसमिल मञ्चमा आक्रमण गरी माओवादी कार्यकर्ताको हत्या गरेको आरोप छ ।
उक्त घटनामा ज्यान गुमाउने परिवार अहिलेसम्म न्यायको अनुभूति नपाएको भन्दै आन्दोलित छन् । उक्त घटनामा तत्कालीन फोरमका अध्यक्ष उपेन्द्र यादव दोषी रहेको आरोप लागिरहेको छ । उक्त फाइल खोलिए यादवलाई समस्या पर्ने बताइन्छ । उक्त सहमतिपछि जसपाले सरकारलाई दिएको समर्थन फिर्ता लिनेसम्मको संकेत गरेको थियो ।
सहमति भएकै दिन कांग्रेस सभापति शेरबहादुर देउवालाई भेटेर जसपाका अध्यक्ष उपेन्द्र यादवले उक्त संकेत गरेका थिए । त्यसको भोलिपल्ट बिहान कांग्रेस नेताहरूको टोली बोकेर देउवाले प्रधानमन्त्री प्रचण्डलाई भेटेका थिए ।
यादवको विषयमा समेत छलफल भएको थियो । त्यसपछि प्रधानमन्त्री प्रचण्डले जसपाका अध्यक्ष यादवसँग पनि छलफल गरेका थिए । स्रोतका अनुसार यादवलाई विश्वास दिलाउनका लागि प्रचण्डले गौरहत्या काण्डका फाइल नखोल्ने वचन दिएको बताइएको छ ।
