काठमाडौं । चर्चित लोक तथा दोहोरी गायिका सिर्जु अधिकारी तथा गायक प्रकाश कटुवालको तिज गीत ‘नाठो पोई’ सार्वजनिक भएको छ ।

प्रकाश कटुवालको युट्युव च्यानलमार्फत सार्वजनिक भएको गीतमा कटुवालकै मौलिक शब्द रहेका छन् । स्मृति तिमिल्सिना (गुरु आमा) ले गीतको निर्देशन गरेकी छिन् । गीतमा कटुवालसँगै चर्चित तथा लोकप्रिय गायिका सिर्जु अधिकारीको कर्णप्रिय आवाज रहेको छ । कटुवालसँगै कलाकारहरू नेहा गौतम, साजन बाँस्कोटा, शोभा विश्वकर्मा, रामचन्द्र अधिकारी र कुस्मा दाहालको उत्कृष्ट अभिनय रहेको देखिन्छ । प्रीज्मा रेकर्डिङ स्टुडियोमा रेकर्ड गरिएको गीतको एरेन्ज चर्चित संगीतकार बीबी अनुरागीले गरेका छन् ।

पछिल्लो समयमा गाउँ समाजमा भइरहेका यथार्थ कुरालाई गीतमा झल्काउन खोजिएको जनाइएको छ । दाजु बहिनीको पात्रबाट अभिनित भिडियोमा भाइले दिदीलाई नाठो पोइसँग उठ्बस गरेको र भिनाजु विदेशमा रहेको देख्न सकिन्छ भनें भाई पनि विदेशीको श्रीमतीसँग लागेको दिदीले दर्साएको बुझ्न सकिन्छ ।

गीतमा बेलाबेलामा कटुवालको ठट्यौलीपना मिसिएसँगै गोप्ते काजीको कमेडी बोली र अभिनयले भिडियो अझ उत्कृष्ट बनेको पाइएको छ । उसो त कटुवाल र अधिकारीले यसअघि छेकेन जामाले, पहेलो बेसार लगायत सफल गीतहरू बजारमा ल्याइसकेका छन् ।