नेपाली कांग्रेसका प्रवक्ता डा. प्रकाशशरण महतले राजनीति आवश्यकताको सिद्धान्तले चल्ने बताएका छन्।
मंगलबार दिउँसो कांग्रेस संसदीय दलको कार्यालय सिंहदरबारमा देउवाको समर्थनमा पुगेका उनले राजनीति आयुको सिद्धान्तबाट नभइ आवश्यकताको सिद्धान्तले चल्ने भएकाले अहिलेको आवश्यकता शेरबहादुर देउवा संसदीय दलको नेतामा चयन हुनु रहेको बताए।
उनले कुनैपनि दलले बहुमत नल्याएको अवस्थामा परिपक्व नेतृत्वको आवश्यकता रहेको बताए। उनले देशले खोजेको नेतृत्व कांग्रेसले प्रस्तुत गर्ने भन्दै अहिले देशले प्रधानमन्त्री शेरबहादुर देउवालाई नै चाहेको दाबी गरे।
उनले अन्य दलहरुसँग मिलेर सरकार बनाउनुपर्ने आवश्यकता भएकाले त्यो गुण, कला र अनुभव देउवासँग मात्रै रहेको जिकिर गरे।
उनले भने, ‘ राजनीति आवश्यकताको सिद्धान्तले चल्छ, आयुको सिद्धान्तमा चल्दैन। कोही बारम्बार हुन्छन् कोही हुँदै हुँदैनन्। परिपक्व नेतृत्वको आवश्यकता छ। देशले खोजेको नेतृत्व हामीले प्रस्तुत गर्ने हो। कांग्रेसको मात्रै बहुमत छैन, हामीले अन्य दलहरुलाई पनि जोडेर सरकार बनाउनु छ। त्यो जोड्ने गुण उहाँमा छ, उहाँ पटक–पटक त्यसै हुनुभएको होइन।’
