भरतपुर । चितवनका विभिन्न अस्पतालमा आज एकैदिन पाँच जना संक्रमितको उपचारको क्रममा मृत्यु भएको छ ।
स्वास्थ्य कार्यालय चितवनले पछिल्लो २४ घन्टामा चितवनका विभिन्न अस्पतालमा पाँच जना संक्रमितको मृत्यु भएको जनाएको छ ।

कार्यालयका अनुसार भरतपुर अस्पतालमा ३ जना, चितवन मेडिकल कलेजमा २ जनाको मृत्यु भएको छ । मृतक पाँचमध्ये चितवनका २, मकवानपुरका २ र गोर्खाका एक जना रहेका छन् । चितवनको अस्पतालमा हाल १७१ जना संक्रमितको उपचार भइरहेको छ । भेन्टिलेटरमा १६, आइसियूमा ५८, एचडियूमा ३४, जनरल वार्डमा ७९ जना संक्रमितको उपचार भइरहेको स्वास्थ्य कार्यालय चितवनले जनाएको छ ।

आज चितवनका विभिन्न अस्पतालबाट २० जना संक्रमित निको भएर डिस्चार्ज भएका छन् । हाल भरतपुर अस्पतालमा ८५ जना, चितवन मेडिकल कलेजमा ४२, कलेज अफ मेडिकल साइन्समा ११ र अन्य अस्पतालमा ३० जना संक्रमितको उपचार भइरहेको छ ।